Сүрүн чөлүгэр түһэрии үлэлэрэ уот лииньийэлэригэр барыахтара. Билигин саппаас уот дизеллэрэ холбонон үлэлээн эрэллэр. Бу туһунан Уус Алдан улууһун баһылыга Алексей Федотов иһитиннэрдэ диэн Ulus.Media суруйар.
— Улахан тэрээһиннэр иннилэригэр хайаан даҕаны буурҕа-силлиэ биллэн ааһар. Мистика диэн эппэппин. Оруобуна бу буолуохтаах эрэ сиринэн ааста дии. Илин, арҕаа өттүлэригэр буор бурҕайа сытар. Биир былыт кэлэн ааста. Былаахтарбыт, баннердарбыт аҕыйаатылар. Төһө кыалларынан чөлүгэр түһэриэхпит, — диэтэ баһылык.
Силлиэ ааспытын кэннэ дьон субуотунньукка таҕыстылар. Тэрийэр кэмитиэт мунньаҕа буолан ааста.
— Бырабыыталыстыба бэрэссэдээтэлэ Андрей Тарасенко мунньаҕы ВКС нөҥүө ыытта, туох көмөҕө наадыйарбытын ыйыталаста. Билигин бэйэбит кыахпытынан үлэни ыытар кыахтаахпыт. Нэһилиэктэрбит бары көмөҕө тахсарга бэлэмнэрин биллэрдилэр. Чугас нэһилиэктэр номнуо кэлэн үлэлээн эрэллэр. Биир бастакынан Үөһээ Бүлүү улууһун дэлэгээссийэтэ көмөлөһөргө этии көтөхтө.
