Амма улууһун кылаабынай агронома Николай Гаврильев иһитиннэрбитинэн, быйылгы ыһыыга улуус үрдүнэн 3541 гектарга туораахтаах бурдук, ол иһигэр сэлиэһинэй 383 гектарга, нэчимиэн 1037 гектарга, эбиэс 2130 гектарга ыһыллыахтаах. Сүөһү аһылыга буолар үүнээйи 4198 гектарга, ол иһигэр элбэх сыллаах 2997 гектарга, биир сыллаах 1201 гектарга былааннанар. Эбиэс булкаастаах горох 1004 гектарга, вика 60 гектарга, сорго 45 гектарга ыһыллыаҕа. Оттон хортуоппуйу 158 гектарга, оҕуруот аһын 17,8 гектарга олордуохтара.
Билиҥҥи туругунан сэттэ богуон бурдук сиэмэтэ «Колос» ХЭУ көмөтүнэн тиэллэн кэллэ, аны икки богуон айаннаан иһэр. «Туймаада» ФАПК 30 туоннаны Чакырга баар «Кэскил» хааччахтаммыт эппиэтинэстээх тэрилтэҕэ аҕалла. «Агрокорм» ХЭУ Т.С.Лукин аатынан ТХПК ыам ыйын 15-17 күннэригэр миэстэтигэр баар гыныаҕа. Биир богуон уоҕурдуу Бөтүҥ уонна Абаҕа бөдөҥ хаһаайыстыбаларыгар кэллэ. Оттон Покровкаҕа «Амма» АО анаммыт 65 туонна, Болугурга 16 туонна, Соморсуҥҥа 16 туонна уоҕурдуу Амурскай уобалаһынан айаннаан иһэр.
Уматык чааһынан бары хааччыллан олороллор. Хаһаайыстыбалар улахан үлэ иннигэр тиэхиньикэлэрин көрүнэллэр, өрөмүөнү ыыталлар. Роман Спасьев дириэктэрдээх «Амма» АО бурдугун сиэмэтин ыраастыы сылдьар. Өйүүн Дмитрий Левин салайааччылаах «Бөтүҥ» ТХПК үлэһиттэрэ бааһыналарыгар сиик саптарыытыгар тахсыахтара. Атыттар күн-дьыл туругуттан көрөн нэдиэлэ бүтүүтэ биитэр кэлэр нэдиэлэ саҥатыгар тахсыахтара, суруйда Алтана Артемьева https://www.instagram.com/amma_olo5o/
