29 Кулун тутар 29.03
  • -11°
  • $ 92,26
  • 99,71

2025 сылга диэри оскуола үөрэнээччилэрэ биир симиэнэҕэ көһүөхтэрэ

17:08, 02 февраля 2017
Текст:
Читайте нас на
Яндекс Новости
ЯДВ

Дьокуускайга, өрөспүүбүлүкэ улахан куораттарыгар, улуус кииннэригэр баар оскуолаларга миэстэ тиийбэт буолан, оҕолор иккилии симиэнэнэн үөрэнэллэр. Аҕыйах сылтан бэттэх, ити үөрэх хаачыстыбатыгар уонна оҕо доруобуйатыгар охсор диэн, биир симиэнэҕэ көһөрөр туһугар бэлиитикэни ыыталлар. Бу туһунан edersaas.ru ааҕыҥ.


Саха сирэ итинтэн эмиэ туора турбат. Манна даҕатан эттэххэ, СӨ Ил Дархана Егор Борисов, РФ Судаарыстыбаннай Дууматын дьокутаата Галина Данчикова, СӨ Үөрэх уонна наука миниистирэ Владимир Егоров  аҕыйах хонуктааҕыта дойду үөрэҕин уонна наукатын миниистирэ Ольга Васильеваны кытта көрсөн инники сайдыылары торумнаабыттара. Ити сырыы мээнэҕэ хаалбатаҕын, тыалга көппөтөҕүн, илэ көрөр кыахтанныбыт. Ол курдук, Саха сиригэр федеральнай субсидия көрүллэр буолбут. Өскөтүн былырыын ити суума 536 мөл. 966 тыһ. солк. эбит буоллаҕына, быйыл эбиллэн, 729 мөл. 418,7 тыһ. солк. тэҥнэспит. Итинник улахан үп уон эрэ субъекка көрүллүбүт. Олор истэригэр Саха сирэ хабыллыбыта улахан суолталаах. СӨ Үөрэх уонна наука миниистирин бастакы солбуйааччы Феодосия Габышева: “Онон үөрэнээччилэр 90 бырыһыаннарын биир симиэнэҕэ көһөрөр сорукпут туолар буолла диэн этэр кыахтаахпыт. Биһиги сыалбыт – саҥа оскуолалары тутан уонна баар тутуулары атыылаһан, 1618 саҥа миэстэни таһаарыы”, — диэн тустаах министиэристибэ пресс-сулууспата ыйыппытыгар хоруйдаабыт. Ити быйылгы сыллааҕы былаан буолар.

Маныаха биири бэлиэтиир тоҕоостоох, федеральнай бүддьүөтү  тардар сыалтан, Г.И.Данчикова СӨ бырабыыталыстыбатын бэрэссэдээтэлинэн үлэлии олордоҕуна, 10 сыллаах былаан оҥоһуллан бигэргэтиллибитэ. Тустаах былаан олоххо икки түһүмэҕинэн киириэхтээх:

I түһүмэх (2016-2020 сс.) — 1-4 уонна 10-11 (12) кылаас үөрэнээччилэрин бастакы симиэнэҕэ көһөрүү.

II түһүмэх (2021-2025 сс.) — 5-9 кылаас үөрэнээччилэрин бастакы симиэнэҕэ көһөрүү.

Ити курдук, уопсайа 58452 саҥа миэстэни таһаарыахтаахтар. Оччотугар 2025 сылга, Саха сирин бары үөрэнээччилэрэ биир симиэнэҕэ көһүөхтэрэ.

Следите за самым важным и интересным в Telegram-канале и WhatsApp-группе ЯСИА