Россия премьер-миниистирэ Дмитрий Медведев Уһук Илин тас дойдулартан инвестициялары тардыыга атын регионнары куоппутун туһунан эттэ.
Госдуумаҕа отчуотун кэмигэр Медведев эппитин курдук, Илин Сибииргэ уонна Уһук Илиҥҥэ маннык улахан болҕомто ууруллубута аныгы историяҕа суоҕа. “Билигин тас дойдулартан инвестицияны тардыы чиэппэрин кэриҥэ Уһук Илиҥҥэ сыһыаннаах”, — диэтэ Медведев.
Бырамыысыланнаска, тыа хаһаайыстыбатыгар оҥорон таһаарыы, тутууну ыытыы Уһук Илиҥҥэ үрдүгүн туһунан премьер бэлиэтээтэ.
Кини этэринэн, бу инвестордар ТОР-дарга үлэлэрин түмүгэ, “Уһук Илиҥҥи гектарга” үлэ уонна бырамыысыланнаһынан дьарыктанааччыларга уот тарыыбын аччатыы түмүгэ, диэн РИА Новости иһитиннэрэр.
СИА
