Ульяна Тарабукина Мэҥэ Хаҥалас улууһун Барыматыгар олорор. Кини оттук маһын дэриэбинэтиттэн 5 км ыраах сиргэ бэлэмниир. Бу күннэргэ Гаврил Прохоров уонна быраата Ким Варламов көмөлөрүнэн кыстыкка туттар саһаанын туруорар.
«Кыһыҥҥы оттор маспытын билигин бэлэмнэннэхпитинэ эрэ сатанар. Гааспыт иҥин суох. Саас сибиэһэй салгыҥҥа үлэлиир үчүгэй бөҕө буоллаҕа. Ити эрээри ыарахан«, — диир Ульяна Ивановна.
Кини эппитинэн, кыһын 20-чэ куб маһынан туорууллар.
Тыа сиригэр барыта үрдүттэн атыыламмата үлэни атахтыыр, ити эрээри хоһуун-хоодуот дьон онтон иҥнибэттэр. «Тыраахтырынан атах тардыстабыт. Ити эрээри бүгүн сэлээркэбит бүтэн, сатыы сырыттылар«, — диэн кэпсиир.
Дэриэбинэҕэ бэйэ хаһаайыстыбалааҕа ордук. 15 төбөлөөхтөр, онтон 6-та ыанар ынах. Онон остуолга куруук сибиэһэй ас баар. Аны булда, сирин аһа. «Барыта бэйэ киэнэ. Төрөөбүт дойдуну таптыахха уонна харыстабыллаахтык сыһыаннаһыахха наада«, — диэн санаатын эттэ.
