Саха сиригэр 2024 сылтан электрическай сапараапка ыстаансыйатын туруоруу саҕаламмыта. Билигин өрөспүүбүлүкэ оройуоннарыгар маннык 13 эбийиэк үлэлиир. Бу туһунан социальнай ситимнэргэ быһа эфир кэмигэр регион промышленноска уонна геологияҕа миниистирин эбээһинэһин толорооччу Михаил Кириллин кэпсээтэ, диэн ЯСИА иһитиннэрэр.
«Өрөспүүбүлүкэҕэ 2024 сылтан электрическай сапараапка ыстаансыйаларын туруоруунан уонна таҥааһынынан дьарыктанан барбыппыт. Бүгүн Дьокуускайга алта, Алдаҥҥа — үс, Аллараа Бэстээххэ — икки, Мииринэйгэ уонна Ленскэйгэ — биирдии туруорулунна. Кинилэр ОДьКХ уонна энергетика министиэристибэтинэн үбүлэммиттэрэ», — диэн Кириллин иһитиннэрдэ.
Кини кэлиҥҥи сылларга электромобиль, ону тэҥэ гибрид ахсаана элбээбитин бэлиэтээтэ. Саха сирин олохтоохторо экологическай, экономическай тырааныспары талаллара элбээбит.
Өрөспүүбүлүкэҕэ электромобиль хаһаайыттарыгар чэпчэтиилэр үлэлииллэр, ол курдук тырааныспар нолуогун төлүүргэ 50% чэпчэтиини ылыахтарын сөп. Санатан эттэххэ, Саха сиригэр 2040 сылга диэри намыһах углероднай сайдыы тосхолун ылыннылар.
