Булуҥ улууһугар төрүүр-ууһуур кыыл табаны харыстыыр сыаллаах 65 000 гектар иэннээх сиргэ анал миэстэ тэрийиэхтэрэ. Онно сөптөөх сиринэн Чекановскай томтор соҕуруу өттө бэлиэтэннэ, диэн Экология министиэристибэтин пресс-сулууспата СИА-ҕа иһитиннэрэр.
Исписэлиистэр этэллэринэн, дьаһал «Бэкэ» өрөспүүбүлүкэ суолталаах резерваты чөлүгэр түһэрии уонна Өлөөн оройуонугар кыстыы барар табалары харыстыыр сыаллаах ылыллар.
Санатар буоллахха, Экология, айылҕаны туһаҕа таһаарыы уонна ойуур хаһаайыстыбатын министиэристибэтэ 2018 сыллаахха РНА СС ирбэт тоҥу үөрэтэр институтун кытта хотугу табаны ааҕыыга авиавизуальнай учуоту оҥорбуттара. Анаабыр, Булуҥ уонна Өлөөн, Эдьигээн оройуоннара хабыллыбыттара. Онно биллибитинэн, Чекановскай томторо билигин соҕотох таба төрүүр, сайылыыр уонна мэччийэр сирэ буолара дакаастаммыта.
Онон лено-оленекскай популяцияны харыстааһыҥҥа бу сөптөөх быһаарыы буолар.
