Үөһээ Бүлүү улууһун балыыһаларын үс санитарнай массыынанан хааччыйыахтара. Тиэхиникэни «Доруобуйа харыстабыла» национальнай бырайыак чэрчитинэн атыыластылар, диэн өрөспүүбүлүкэ Доруобуйа харыстабылын пресс-сулууспата иһитиннэрдэ.
Былырыын 4 санитарнай массыынаны ылбыттара уонна Туобуйа, Тамалакаан, Хоро нэһилиэктэрин балыыһаларыгар, ону тэҥэ улуустааҕы поликлиникаҕа анаабыттара.
«Саҥа тиэхиникэ медиктэр үлэлэрин биллэрдик чэпчэтэр, ордук ыраах сытар нэһилиэктэр эрэйи көрөллөр», — диэн Үөһээ Бүлүү киин балыыһатын кылаабынай бырааһа Сардана Павлова бэлиэтиир.
