Тыа сирэ былыр-былыргыттан норуот бигэ туругун мэктиэтэ буолар. Нам улууһугар үлэ дьонугар болҕомто ууруу, социальнай суолталаах эбийиэктэри тутуу, олоҕу тупсарыы кэлимник сайдан иһэр. Соторутааҕыта Кыһыл Дэриэбинэҕэ элбэх функцияны толорор киини уонна фельдшерскэй-акушерскай пууну үөрүүлээхтик аһыы буолла.


2012 сылтан Кыһыл Дэриэбинэҕэ олохтоох дьаһалта уонна нэһилиэк олохтоохторо бэйэлэрин баҕа өттүлэринэн элбэх функцияны толорор киин тутуутун саҕалаабыттар. Бу сыл фундаменын Владимир Сивцев салайааччылаах «Уйгу» тэрилтэ оҥорбут. Онтон 2013 сылтан «Үтүө дьыала» программаҕа киирэн тутуу үлэтэ салҕанан барбыт. Манна Николай Теплоухов салайааччылаах «СахаДомСтрой» конкурсу кыайан 4 мөл. 810 тыһ. солк. суумалаах үлэ ыытыллыбыт. Салгыы 2015 с. 1 мөл. 650 тыһ. солк. көрүллэн «ЗСМК» тэрилтэ чэпчэки конструкция матырыйаалынан каркааһын таҥан оҥорбут. 2017 сыллаахха 5 мөл. үп-харчы анааннар «АйСтрой» тутуу тэрилтэтэ куонкуруска кыайан үлэ салгыы барбыт. Онтон 2018 сылга 17 мөл. 700 тыһ.солк. үбү көрөннөр Вадим Кутуков салайааччылаах «Намстрой» тэрилтэ, Петр Матвеев салайааччылаах «РегионСтрой» уонна ИП Шарапов тутуу үлэтин тиһэҕэр тиэртилэр. Кыһыл Дэриэбинэ олохтоохторо киэҥ-куоҥ, сырдык, сылаас саҥа дьиэҕэ Саҥа дьылы көрсөр буоллулар.

Саҥа тутуллубут спорт уонна култуура дьиэтин аһыллыбытын кэрэһэлиир аалай кыһыл лиэнтэни «Нам улууһа» МТ баһылыга Юрий Слепцов, «Мин Сахам сирэ — 21 үйэҕэ» республикатааҕы үтүө дьыала хамсааһынын дирекциятын салайааччы Алексей Петров, «Намстрой» ХЭТ салайааччыта Вадим Кутуков, Кыһыл Дэриэбинэ «Сайдыы» сынньалаҥ киин салайааччыта А.Г. Винокурова, «Биир ньыгыл Арассыыйа» баартыйа Саха сиринээҕи региональнай салаатын комитетын салайааччы Л.А. Шибаев быстылар. Саха үгэһин быһыытынан алгысчыт, СР культуратын туйгуна Петр Охлопков уот оттон Үрдүкү айыыларга сүгүрүйэн сиэри-туому толордо.

Тэрээһин үөрүүлээх чааһыгар ыраахтан-чугастан кэлбит ыалдьыттарга, саҥа элбэх функцияны толорор дьиэ тутуутугар үлэлэспит дьоҥҥо улуус, нэһилиэк дьаһалтатын, сынньалаҥ киин аатыттан истиҥ-иһирэх эҕэрдэ тыллар этилиннилэр, махтал суруктар, анал бэлиэлэр туттарылыннылар. Маны таһынан, сынньалаҥ киин салайааччыта Айталина Винокурова тутууга үлэлэспит тэрилтэлэргэ, субуотунньуктарга кыттыбыт олохтоохторго махтанна. «Биир ньыгыл Арассыыйа» баартыйа «Местный дом культуры» бырайыагынан МФЦ-га 1 мөл. 100 тыһ. солк. суумаҕа миэбэл, уот-күөс, тыас-уус аппараатын уонна сыана кэннинээҕи быыс биэрбитин тоһоҕолоон бэлиэтээтэ.

Улуус баһылыга Юрий Слепцов маннык киэҥ-куоҥ дьиэҕэ, сынньалаҥ киинигэр хайаан да үрдүк сыана баар буолуохтааҕын ыйан туран, «Хатыҥ Арыы» МТ дьаһалтатын кытта хомуллар, сыҕарыйар сыана оҥоруутугар үлэлэһиэхпит диэн эрэннэрдэ. Хатыҥ Арыы дьаһалтата 50 тыһ. суумалаах сертификат, Кыһыл Дэриэбинэттэн төрүттээхтэр Степан Эверстов теннис остуола, М.К. Аммосов аатынан ХИФУ доцена, техническэй наука кандидата Мария Слепцова култуураҕа сыһыаннаах кинигэлэри бэлэхтээтилэр. Бу күнтэн ыла саҥа эбийиэккэ дьон-сэргэ сылдьыыта үксүө, оҕо-аймах тоҕуоруһа мустуо, ыччат спорду уонна култуураны тэҥҥэ тутан сайдыа-чэчириэ диэн эрэнэбит диэтилэр.


Бу күн Кыһыл Дэриэбинэҕэ доруобуйа харыстабылын салаатынан фельдшерскэй-акушерскай пууну үөрүүлээх аһыы тэрээһинэ буолла. Үгэс быһыытынан саҥа дьиэ аһыллыытын мэктиэлиир кыһыл лиэнтэни СР булгуччулаах медицинскэй страховкаҕа фондатын директора Александр Горохов, «Нам улууһа» МТ баһылыга Юрий Слепцов уонна Намнааҕы киин балыыһа кылаабынай бырааһа Иван Замятин быстылар. Дьон-сэргэ чэгиэн-чэбдик сылдьалларын туһугар тутуллубут дьиэ үлэҕэ киириитин үөрүүлээх күнүгэр айыыларга сүгүрүйэн Петр Охлопков алгыс сиэрин-туомун толордо.

Фельдшерскэй-акушерскай пууну хара маҥнайгыттан бүтүөр диэри туппут предприниматель Василий Бурнашев көмөлөспүт дьонугар махтал суруктары туттартаата, бэлиэ күлүүһү киин балыыһа кылаабынай бырааһыгар Иван  Замятиҥҥа туттарбытын, кини саҥа дьиэ бырааһыгар Вера  Павловаҕа өйдөбүнньүк быһыытынан туттарда.

Ааптар: Семен АРГУНОВ

1
0
comments powered by HyperComments