Ону сэргэ биллиилээх олоҥхоһукка анаан Хайахсыт нэһилиэгин нэһилиэк урукку баһылыга А.П. Дорофеев көҕүлээһининэн оҥоһуллубут бюст туруорулунна. Бюһу улуус баһылыга А.Т. Ноговицын, улуус Сэбиэтин председателэ Я.П. Оконешников, Хайахсыт нэһилиэгин баһылыга В.В. Прудецкай, И.Г. Тимофеев-Теплоухов быраата Афанасий Васильевич төрөппүт кыыһа В.А. Тимофеева үөрүүлээх быһыыга-майгыга арыйдылар.
Эстетическэй киин аһыллыытыгар аалай кыһыл лиэнтэни улуус баһылыга А.Т. Ноговицын, “Үөрүү” Оҕо дьоҕурун сайыннарар киин дириэктэрэ Д.А. Илларионов, В.А. Тимофеева уонна Дириҥ орто оскуолатын 9-с кылааһын үөрэнээччитэ Егор Кирсанов быһа кырыйдылар.
Саҥа аһыллыбыт кииҥҥэ норуот маастардарын быыстапкалара, техническэй куруһуокка дьарыктанар үөрэнээччилэр аныгы технология көмөтүнэн оҥорбут оҥоһуктара дьон болҕомтотун тартылар.
Оҕо кэрэни кэрэхсииригэр, ис кыаҕын туһанан дьоҕурун, талаанын сайыннарарыгар ананан тутуллубут киэҥ-куоҥ сырдык уораҕай кэнчээри ыччат сайдарыгар дьоһун олугу ууруо.
Семен Жендринскэй
