Томполор кыһыҥҥы спартакиадаҕа бэлэмнэнэллэр
- Барыллааһын быһыытынан, хамаандаҕа 27 спортсмен уонна 8 бэрэстэбиитэл киириэҕэ. Ол курдук, хайыһарга аҕыс киһи кыттыаҕа. Хоккейга 11 киһилээх хамаанда барыаҕа. Кинилэр бары бу көрүҥнэринэн уруккуттан сөбүлээн дьарыктанар Мэҥэ Алдан бэрэстэбиитэллэринэн буолаллар. Хоккейга биир сүрүн оонньооччунан уонна тренеринэн нэһилиэк баһылыга Юрий Комиссаров бэйэтэ буолар. Бу нэһилиэккэ шорт-трекка кытта дьарыктаналлар.
- Күүстээх көрүҥмүтүнэн хотугу многоборье буолар. Ол курдук, Россия маастара Руслан Ханов төрөөбүт Томпо эбээн нэһилиэгин дьаһалтатыгар специлиаһынан үлэлиир, оттон мантан төрүттээх Саха сирин икки төгүллээх чемпиона Наталья Пермякова Хаандыгаҕа телеоператордыыр. Маны сэргэСаха сирин призердара бааллар. Бу көрүҥҥэ хамаандаҕа бастыҥтан бастыҥнары ылыахтара.
- Бэл сноуборд диэн тыа сиригэр дьикти көрүҥүнэн дьарыктанааччы баар. Ол курдук, эмиэ Мэҥэ Алдан музыкальнай оскуолатын директора Роман Чириков бу көрүҥүнэн дьарыктанара биллэн, күрэхтэһэ барарга бэлэм буолан үөртэ.
- Манна даҕатан эттэххэ, билиҥҥи Томпо улууһун 3-с Байаҕантай нэһилиэгэр төрөөбүт Мэхээлэ Тарабукин Алдаҥҥа кыһыл көмүһү булан, экспедицияҕа кэпсээн, сирдээн көрдөрөн Саха сиригэр көмүс промышленноһа сайдарыгар улахан үтүөлээҕин бары билэбит. Онон томполор биир дойдулаахпыт төрүттэспит куоратыгар тиийэн кыһыл көмүс мэтээллэри ылар бигэ санаалаахпыт.
