Танда орто оскуолата 2010 сыллаахтан агро хайысхалаах оскуола быһыытынан үлэлиир. Онтон ыла оскуола иһинэн «Уйгу» ТХПК тэриллибитэ.
Оскуола үөрэнээччилэрэ уопсайа үс гаа сиргэ оҕуруот аһын арааһын үүннэрэллэр. Хаппыыста үс көрүҥүн, хортуоппуй икки көрүҥүн уонна Саха сиригэр үүнэр оҕуруот аһын барытын үүннэрэллэр. Быйыл оскуола оҕуруоччуттара, холобурдаан этэххэ, икки центнер хаппыыстаны, сэттэ центнер моркуобу, алта аҥаар центнер сүбүөкүлэни, үс туоннаттан тахса хортуоппуйу ылбыттар.
Саас эрдэттэн саҕалаан сайыны быһа бүөбэйдэһэн ылбыт үүнүүлэринэн оскуола уонна нэһилиэк уһуйаанын бэйэ оҕуруотун аһынан хааччыйаллар итиэннэ нэһилиэк олохтоохторугар, улуус киинигэр да киллэрэн атыылыыр үгэстээхтэр.
Онуоха быйыл бородууксуйаны вакуум салапааннаан тастыыр массыынаны ылынан, үөрэнээччилэр борщ туматын оҥорон атыыга таһаардылар.
Мария Аргунова,
Мүрү саһарҕата
