Быйыл киэн туттар биир дойдулаахпыт, уһулуччулаах государственнай уонна политическай деятель Максим Аммосов төрөөбүтэ 125 сылынан тутуу тэтимнээхтик баран, Наммыт киинэ өссө тубуста-киэркэйдэ.
Алтынньы 27 күнүгэр «Формирование комфортной городской (сельской) среды на территории МО «Ленский наслег» муниципальнай сыаллаах программанан Ленскэй нэһилиэгэр тупсаҕай көстүүлээх, бөҕөргөтүүлээх Максим Аммосов биэрэгэ (набережная) олоххо киирбитин үөрүүлээхтик бэлиэтээтибит.
Тутуу туһунан билиһиннэрэр буоллахха, 800 кв. м иэннээх сиргэ искусственнай газон тэлгэтилиннэ, тротуарнай билииккэ уурулунна, сатыы дьон сылдьарыгар анаан хаамар сир оҥоһулунна, 54 устуука аныгы оҥоһуулаах ыскамыайка, бөх быраҕар ууруналар туруорулуннулар. Оҕо былаһааккатыгар уонна скейтпаркаҕа оҕо аймах, ыччат оонньуур тэриллэрэ оҥоһулуннулар. Саамай сонун тутууларынан икки муоста буоллулар. Улуус сүрүн дьарыгын, сүөһү иитиитин, кэрэһэлээн, смотровой уонна иккис муосталар киирии аркаларын үрдүлэригэр 11 «туос ынах» ойууламмыт. Бу оҥоһуулар туох ис хоһоонноохторуй? Ойуулар Нам улууһа сэттэ төгүл тыа хаһаайыстыбатын салаатыгар республикаҕа кыайыытын кэпсииллэр. Болуоссат тулата 35 тупсаҕай көстүүлээх уулусса банаардарынан сырдатылынна.
Тутуу дьоҥҥо-сэргэҕэ өр сылларга сулууспалаатын диэн алҕаан туран, бэдэрээтчит, индивидуальнай предприниматель Валентина Леонидовна Кривогорницына аатыттан Семен Юрьевич Кривогорницын «Ленскэй нэһилиэк» МТ баһылыгар Петр Григорьевич Сокольниковка алгыстаах бэлиэни туттарда.
Набережнай аһыллыытын аалай лиэнтэтин «Нам улууһа» муниципальнай тэриллии баһылыга Юрий Иннокентьевич Слепцов, СӨ Ил Дарханын дьаһалтатын иһинэн үлэлиир архитектура уонна градостроительство управлениетын салайааччыта Алексеева Ирина Дмитриевна, «Ленскэй нэһилиэк» муниципальнай тэриллии баһылыга Петр Григорьевич Сокольников уонна “ИП Кривогорницына Валентина Леонидовна» тэрилтэ бэрэстэбиитэлэ Семен Юрьевич Кривогорницын быстылар.
Салгыы үөрүүлээх тэрээһин кыттыылаахтара набережнай устун сылдьан сонун тутууну сэргии, сөҕө-махтайа көрдүлэр.
«Нам улууһа» муниципальнай тэриллии баһылыга Юрий Слепцов: “Максим Аммосов набережнайа Наммыт килбэйэр киинигэр тутулунна. Санатан этэр буоллахха, бырайыагы Нам улууһун олохтоохторо куйаар ситимин нөҥүө куоластаан кыайбыттара. Онон, үүммүт үөрүүлээх түгэммит нэһилиэнньэ бүттүүнүн ситиһиитэ буолар. СӨ Ил Дарханыгар Айсен Сергеевич Николаевка, Ил Дархан дьаһалтатын архитектура уонна градостроительство управлениетын салайааччыта Ирина Дмитриевна Алексееваҕа уонна СӨ Үүнэр көлүөнэ сыаллаах фондун киинигэр махталбыт улахан. Дьону-сэргэни кытта элбэхтэ сүбэлэһэн оҥоһулунна. Сотору кэминэн Култуурабыт дыбарыаһа үлэҕэ киириэҕэ. Эһиил ырыынак таһыгар киэҥ-куоҥ массыына тохтуур сирин оҥоруохпут. Манна дьон дуоһуйа сынньанар сирдэрэ буолуоҕа”, — диэн бэлиэтээн этэн туран, СӨ кылаабынай архитекторыгар Ирина Алексееваҕа “Нам улууһун сайдыытыгар кылаатын иһин” бэлиэни туттарда.
СӨ кылаабынай архитектора Ирина Алексеева: «Нам улууһугар аныгылыы көстүүлээх, элбэх функциялаах — оҕо, ыччат, аҕам саастаах дьон сынньанар сирдэрэ баар буолбутунан барыгытын эҕэрдэлиибин!
Эһиги Юрий Иннокентьевич Слепцов курдук олус үлэһит, инникини өтө көрөн үлэлиир баһылыктаах дьоллоох дьоҥҥут. 2018 сыллаахха кылаабынай архитекторынан анаммыппар республика баһылыктарыттан аан бастакынан миэхэ Юрий Иннокентьевич кабинеппар киирбитэ. Ол кэмтэн ыла бииргэ үлэлээн, былааннаан киирэн барбыппыт. Бастаан Олоҥхо ыһыаҕын дизайн-кодун оҥорон саҕалаабыппыт. Онтон салгыы былаантан былаан үөскээн испитэ. Архитектурнай куонкурус ыыппыппытыгар Нам улууһа аан бастакынан кыттыбыта. Быйыл Набережнайбыт тутуутун бүтэрдибит. Маннык үлэ биир сыл иһигэр оҥоһуллубат, өр кэмҥэ иитиэхтээн олоххо киллэрдибит. Ленскэй нэһилиэгин баһылыга Петр Григорьевичтыын былааммыт элбэх. Бүгүн көрсөн эмиэ улахан сүбэни туттубут. Кэлэр сылларга Доҕордоһуу болуоссатын, о.д.а. общественнай сирдэри тупсарыахпыт. Аҥардас тупсарыы үлэни ыыппакка эрэ, өссө объектар, дьон олорор кыбаарталларын тас көстүүлэригэр үлэлэһиэхпит. Култуура Дыбарыаһан дизайн-кодугар үлэлэстибит. Дьоҥҥо үчүгэй сыһыаннаах, кинилэргэ табыгастаах усулуобуйаны оҥорор баҕалаах салайааччылардааххытыттан үөрэбит. Дойдугутун харыстааҥ, сайыннарыҥ. Барыгытыгар улахан махталбын тиэрдэбин!”
Мустубут дьону СӨ Үүнэр көлүөнэ сыаллаах фондун киинин салайааччыта Ирина Афансьевна Маркина, Ленскэй нэһилиэгин баһылыга Петр Григорьевич Сокольников, улуус депутаттарын сэбитэтин председателэ Алексей Иванович Винокуров эҕэрдэлээтилэр. Бу күн тутуу олоххо киириитигэр үлэлэспит дьон наҕараадаланнылар.
ССРС култууратын туйгуна, СӨ култууратын үтүөлээх үлэһитэ Елена Кутукова салайааччылаах «Нарыйаана» вокальнай ансаамбыл ылбаҕай ырыатын, И.Е. Винокурова аатынан Намнааҕы педколледж устудьуоннарын “БИНИНС” пед. этэрээт тэтимнээх үҥкүүтүн бэлэхтээтилэр.
Инникитин киэн туттар биир дойдулаахпыт аатын үйэлэргэ ааттатар Максим Аммосовпыт набережнайа дьон-сэргэ сөбүлээн сынньанар сирдэрэ буолан, сырдыкка, кэрэҕэ угуйуоҕа, төрөөбүт түөлбэнэн киэн туттууну иитиэҕэ.
Бүгүн «Ленскэй нэһилиэк Аммосов болуоссатын кытылын тупсарыы” бырайыак Нам улууһун сайдыытын историятыгар үйэлээхтик киирдэ.
Ааптар: «Нам улууһа» МТ пресс-сулууспата
