Госдуума үлэ чааһын таһынан үлэ иһин төлөбүр усулуобуйаларын туһунан сокуоҥҥа уларытыылары ылынна.
Сокуоҥҥа уларытыылары киллэрэр туһунан көҕүлээһин Конституционнай суут быһаарыытынан оҥоһуллубута уонна 2024 сыл балаҕан ыйыттан күүһүгэр киириэҕэ.
Үлэ чааһын таһынан үлэ диэн тугуй?
Үлэни биэрээччи көҕүлээһининэн үлэ чааһын таһынааҕы үлэ барыта ааҕыллар. Маннык үлэ иһин харчынан компенсация оҥоһуллар, эбэтэр эбии сынньалаҥ бэриллэр.
Үлэһит маннык түгэҥҥэ, өскөтүн, дуогабарга нуормаламматах үлэ күннээх диэн ыйыллыбыт буоллаҕына, кэмиттэн кэмигэр үлэ чааһын таһынан төлөбүрэ уонна сөбүлэҥэ да суох үлэлиирин билиэхтээх. Оччотугар, сыллааҕы төлөбүрдээх уоппускатыгар эбии үс күнтэн итэҕэһэ суох сынньалаҥ хонуга эбиллэр.
Биир үлэһит кэми таһынан үлэтин уһуна сылга 120 чаастан, субуруччу икки хонук устатыгар 4 чаастан ордук буолуо суохтаах. 18 саастарын туола илик, хат дьахталлар кэми таһынан үлэҕэ үлэлииллэрэ көҥүллэммэт.
Саҥа сокуон киирдэҕинэ туох уларыйыаҕай?
Билигин сокуон быһыытынан, кэми таһынан үлэ иһин төлөбүрэ тарыып ыстаапкатынан, эбэтэр акылаатынан эрэ быһыллан турар, компенсацията уонна көҕүлүүр төлөбүрэ суох. Онон үлэни биэрээччи бэйэтин көрүүтүнэн төлөнөр.
Оттон 2024 сыл балаҕан ыйын 1 күнүттэн, оросчуоту оҥорууга бары бириэмийэлэр уонна төлөбүрдэр киириэхтэрэ.
Компенсация кээмэйэ төһөнүй?
Үлэ бастакы икки чааһа 1,5 төгүл, оттон кэлэр чаастара- кырата 2 төгүл ордук төлөнүөхтээх. Эбэтэр, үлэһит баҕатынан, сынньалаҥ кэминэн компенсацияланыан сөп, суруйда Саха парламент саайт.
