21 От ыйа 21.07
  • 23°
  • $ 88,02
  • 96,04

Хатырык уонна хаһыат-эковата алаһа дьиэни сылааһынан угуттууллар

23:32, 30 апреля 2018
Текст:
Читайте нас на
Яндекс Новости
ЯДВ

Дьокуускай Мархатын олохтооҕо, биирдэм предприниматель Николай Баишев сиргэ-буорга тэпсэ сылдьар эбэтэр, бөхпүтүн-сахпытын ыраастаннахпытына, уматан кэбиһэр хатырыкпытын, маспыт сыыһын туһаҕа таһаарыыга туруммута үһүс сылыгар барбыт.

“Соҕуруу сакаастаан, бытарытар тэрил ылбытым. Хатырыгым фракцията бытархайдаах-бөдөҥнөөх буолар. Эрбии көөбүлүн курдук үчүгэйдик бытарыйбыта быыһы-хайаҕаһы барытын бүөлээн кэбиһэр. Дьон дьиэлэрин “хара муосталаары” уонна дьиэ үрдүгэр кутаары ылаллар”, — диир Николай Алексеевич.

Былырыын инновацияҕа бырайыак оҥорон, Дьокуускай куорат дьаһалтатыттан көмө харчы ылбыт. Ол иһин сыанатын түһэрэн, хатырык хаттыгаһын харса суох тарҕатарга туруммут. Куулунан атыылыыр. Сайын көмөҕө 2 үлэһиттэнэр. “Эксперименнии таарыйа бэйэм дьиэм биир өттүн хатырык көөбүлүнэн, иккис эркинин эковатанан хаттыгастаан эпсиэйдээбитим. Сылааһы туталлара тэҥ соҕус”, — диир Н.Баишев.

Эковатаны Дьокуускайга “Вектор” ХЭУо оҥорон таһаарар. Сыах начаалынньыга Павел Павлов этэринэн, эковата 70-80 бырыһыана хаһыаттан, онтон атына А 4-тээх кумааҕыттан турар. Оттон кумааҕы, биллэрин курдук, мастан ылыллар. Онон хатырыктыын аймахтыылар. Ити эрээри, эковатаны умайбат уонна кутуйах буулаабат дииллэр. Састаабыгар бураны, борнай кислотаны эбэн булкуйаллар эбит. Оччоҕо Макулатураны хантан ылалларый? “Чэпчэкитик (1 киилэни 3-түү солкуобайга) тутар буоламмыт дьон эргэ хаһыаты аанньа туттарбат. Типографиялары кытта быһаччы кэпсэтэн, быраахтаммыт хаһыаты ылабыт”, — диир Павел Игнатьевич.

Ыйга 15-тии киилэлээх 2-2,5 тыһ. куул эковатаны оҥорон таһаараллар. Бородууксуйаларын кууһунан атыылаһааччылар ылаллар. Кыһын аҕырымныыр кэмигэр элбэҕи оҥорон хаһааналлар. Үгэс курдук, саас кус, сайын ыһыах кэннилэриттэн сакаастааччы элбиир. Эмиэ Н.Баишев хатырык көөбүлүн курдук, дьиэ анныгар-үрдүгэр полистиролу, базальты солбуйар бэртээхэй хаттыгас буолар аналлаах.

Василий НИКИФОРОВ,edersaas.ru

Следите за самым важным и интересным в Telegram-канале и WhatsApp-группе ЯСИА