Дьокуускайга Өрөспүүбүлүкэ күнүгэр судаарыстыбаннай деятель Максим Аммосов сырдык аатыгар сибэкки уурулунна. Саха сирин салалтата, уопсастыбанньыктар уонна устудьуоннар кыттыыны ыллылар.
Регион салалтатын администрациятын салайааччыта Георгий Михайлов тыл эттэ. Ыччакка туһаайда. «Максим Аммосов, Платон Ойуунускай, Исидор Барахов, Семен Аржаков куруук үчүгэйдик үөрэммиттэрин, билиигэ дьулуспуттарын, доҕордуу этилэрин история суруйар. Кинилэр үөрэнэр кэмнэригэр билсибиттэр. Кинилэр биһиги өрөспүүбүлүкэбитин туппуттара, сайдыытын сахпыттара. Кинилэр хаһан да ханна да сылдьыбыттарын иһин төрөөбүт дойдуларын умнубатахтара. Кинилэр төрөөбүт дойдулара бастыҥ сир буоларын баҕараллара. Кинилэр курдук эһиги эмиэ Сахаҕыт сирин таптыаххытын, сайдыытын туһугар үлэлиэххитин баҕарабын», — диэтэ кини.
М. К. Аммосов аатынан университет ректора Анатолий Николаев бу киүн Максим Аммосов аатынан стипендияны биэс устудьуоҥҥа туттарда, үөрэххэ, чинчийэр үлэҕэ, олоххо сыһыаҥҥа, университет имиджин көтөҕүүгэ бастыҥ көрдөрүүлэрин иһин.
