Саха сирин баһылыга сыл бастакы кыбаарталыгарр национальнай бырайыактары олоххо киллэрии хаамыытын ырытан туран, Россия президенэ көҕүлээбит национальнай бырайыактарын өрөспүүбүлүкэҕэ приоритеттарын бэлиэтээтэ.
«Тутаах приоритетынан «Дьиэ кэргэн», «Олох инфраструктура», «Уһун уонна көхтөөх олох» уонна «Ыччат уонна оҕо» национальнай бырайыактар буолаллар. Кинилэр дьон олоҕун тупсарыыга туһуланаллар, доруобуйа харыстабылын, үөрэх, дьиэнэн-уотунан хааччыйыы уонна демография боппуруостарын быһаарарга аналлаахтар», — диэтэ Айсен Николаев.
Быйылгы сылга национальнай бырайыактары олоххо киллэриигэ өрөспүүбүлүкэ бюджетыгар көрүллүбүт үп суумата 36,19 млрд солк., онтон 26,25 млрд солк. федеральнай бюджеттан турар. 2026 сылга өрөспүүбүлүкэҕэ 91 көрдөрүүнэн тус сыаллаах суолталар быһаарылыннылар. Бастакы кыбаартал түмүгүнэн 74 көрдөрүүнэн былааннаах ыйдааҕы сыаннастар ситиһиилэрэ бэлиэтэнэр. Кулун тутар ыйга ситиһии таһымын мониторина 98,2% тэҥнэстэ.
Айсен Николаев бырабыыталыстыба чилиэннэригэр уонна региональнай бырайыактар куратордарыгар аадырыстаах сорудахтары биэрдэ. Регион салайааччыта 2026 сыл үс ыйын түмүгүнэн атыылаһыы муҥутуур кээмэйэ хааччыллыахтааҕын, ону тэҥэ 2027 сылга киллэрэргэ былааннаммыт хапытаалынай тутуу эбийиэктэригэр бырайыактыыр-сметнай докумуоннарга судаарыстыбаннай экспертиза үтүө түмүктэрэ ылыллыахтааҕын бэлиэтээтэ: үс оскуолаҕа уонна түөрт оҕо саадыгар.
«Үс оскуолаттан Дьокуускайга Чайковскай уулуссаҕа баар биир эрэ оскуола үчүгэй түмүк ылла, түөрт оҕо саадыттан иккитигэр бырайыактыыр-смета докумуоннарын оҥоруу да саҕаламмата. Ураты болҕомто киинигэр хапытаалынай тутуу эбийиэктэрин бырайыактыыр-сметнай докумуоннарын кэмигэр контрактациялааһын уонна судаарыстыбаннай экспертизаны ааһыы буолуохтаах. Бырайыактар салайааччылара көрдөрүүлэри ситиһиигэ үлэни күүһүрдүөхтээхтэр уонна ыйдааҕы былааны кэһиэ суохтаахтар», — диэн Айсен Николаев ыйда.
Саха сирин баһылыга итини сэргэ саахалланар дьиэ пуондатыттан гражданнары көһөрүү саҥа өрөспүүбүлүкэтээҕи аадырыстаах бырагырааманы ылыныы болдьоҕор кэһиини ыйда.
«Ити бырайыагы олоххо киллэриигэ эбии кутталы үөскэтэр. Саха сирин тутуутун министиэристибэтигэр аадырыстаах бырагырааманы бигэргэтиини төһө кыалларынан кылгас болдьоххо хааччыйыахха наада», — диэн Айсен Николаев сорудахтаата.
Сиһилии манна ааҕыҥ.
