Күндү Саха сирин олохтоохторо! Саха Өрөспүүбүлүкэтин салалтатын уонна тус бэйэм ааппыттан эһигини Хомус күнүнэн уонна Хомус аан дойдутааҕы түмэлэ уонна киинэ тэриллибитэ 30 сылынан эҕэрдэлиибин!


Дьокуускайга Хомус аан дойдутааҕы түмэлин уонна киинин тэрийии саха хомуһун устуоруйатыгар биир ураты суолталаах түгэн.

Бу тэрилтэ бэриниилээх, сыралаах үлэтинэн бүгүн Сахабыт сирэ аан дойдуга хомус музыкатын сайыннарыы киининэн аатырыаҕын аатырар. Ханнык да дойдутааҕар хомусчуппут ахсаана элбэх. Хомуһу тардарга оскуола иннинээҕи үөрэх тэрилтэлэригэр, оскуолаларга үөрэтэллэр, хомус үөрэҕэ орто анал үөрэх кыһаларын программатыгар киирэр.

Ааспыт 30 сыл устата Хомус аан дойдутааҕы түмэлэ уонна киинэ өрөспүүбүлүкэбитигэр хомуһу үөрэтиигэ, чөл хаалларыыга уонна сайыннарыыга, хомус тас дойдуларга дьон-сэргэ биһирэбилин ыларыгар киэҥ үлэни ыытта. Бу кэм устата хомус кутуллар дорҕоонугар абылаппыт энтузиастар уонна култуура кииннэрин аан дойдутааҕы ситимэ тэриллэн, үгэс буолбут култуурабыт уонна духуобунай баайбыт хаҥыыр тосхоло түстэннэ.

Хомус – дьырылаан-дьурулаан, этигэнин киллэрэн кэпсээн бардаҕына, сүрэҕи-быары долгутар, өйү-санааны өрүкүтэр, үрдүккэ кынаттыыр, ааспыты аныгыны кытта ситимниир дьикти эйгэни үөскэтэр саха омук төрүт култууратын ураты инструмена буолар. Сахабыт сиригэр анаан-минээн хомус алыптаах дорҕоонун истээри аан дойду араас муннуктарыттан кэлэллэр. Глобализация үйэтигэр төрүт култуурабытын чөл хаалларыыга өрөспүүбүлүкэбитигэр маннык дьоһун ситиһиибит Хомус аан дойдутааҕы түмэлин уонна киинин сүҥкэн өҥөтө буолара саарбахтаммат.

Бу үөрүүлээх күҥҥэ Хомус аан дойдутааҕы түмэлин уонна киинин кэлэктиибигэр төрөөбүт өрөспүүбүлүкэбит чэчирии сайдарын туһугар кыһамньылаах үлэҕит иһин барҕа махталбын тиэрдэбин!

Күндү доҕоттор! Хомус төрүт култуурабытын сайыннарарга, иннибит диэки эрэллээхтик хардыылыырбытыгар үйэлэри, көлүөнэлэри ситимниир арахсыспат аргыс буоллун! Барыгытыгар үтүөнү, эйэни, дьолу уонна дойдубут, өрөспүүбүлүкэбит чэчирии сайдарын туһугар таһаарыылаах үлэни баҕарабын!

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.