Саха сирин баһылыга Айсен Николаев Российскай Федерация президенэ Владимир Путин инаугурациятыгар кыттыыны ылла. Церемония үгэс быһыытынан Улахан Кремль дыбарыаһыгар Андреевскай саалаҕа буолла.
«Владимир Владимирович бэйэтин этиитигэр өссө биирдэ тоһоҕолоон биһиги биир сомоҕо уонна улуу норуот буоларбытын эттэ, ханнык баҕарар моһоллору кыайар уонна толкуйдаабыппытын толорор. Бииргэ. Эрэнэбин, оннук куруук буоларыгар!» — диэн Ил Дархан бэйэтин телеграм-ханаалыгар суруйда.
2024 сыл кулун тутарыгар Россия президенин быыбарыгар быыбардааччы 87,28% куолаһын ылан, Владимир Путин кыайбыта. Аҥардас Саха сиригэр быыбардааччы 87,79%-на кини туһатыгар куолаһын биэрбитэ. Бу региоҥҥа историяҕа киирэр муҥутуур көрдөрүүнэн бэлиэтэнэр. Айсен Николаев оччолорго элбэх норуоттаах Саха сирэ дойду лидерын өйүүрбүт бэлиэтэ буоларын эппитэ.
Президент инаугурациятын кэнниттэн, сокуон быһыытынан дойду бырабыыталыстыбата ууратыллар. Миниистирдэр кабинеттара саҥа састаап ананыар диэри «эбээһинэһи толорооччуларынан» буолаллар. Быйыл кабинет саҥа быраабылаларынан оҥоһуллар.
