2025 сылга диэри уонна 2035 сылга туһаайан, Уһук Илин сайдыытын Национальнай бырагырааматын сүрүн сыала-соруга — Уһук Илинтэн нэһилиэнньэ көһөн барыытын аҕыйатыы, манна олохсуйарга табыгастаах усулуобуйаны тэрийэн, олох таһымын үрдэтии. Ол туһунан Ил Дархан Айсен Николаев балаҕан ыйын 4 күнүгэр РФ Судаарыстыбаннай сүбэтин Президиумун мунньаҕар этэн турар.
«Күн бүгүн эрэгийиэнтэн 16-30 саастаах дьон көһөн барар. Уһук Илин нэһилиэнньэни олохсутарга эдэр ыччат ис кыаҕын арыйарыгар, дьиэ кэргэнинэн үчүгэй усулуобуйаҕа олороругар бырагыраамабытыгар этии киллэрдибит», — диэн бэлиэтээтэ Айсен Николаев. Бастатан туран, сүрүн болҕомто улахан тэрилтэлэри кытта аныгы үйэ ирдэбилигэр эппиэттиир идэлээх дьону эрдэттэн бэлэмнээн таһаарар киин ситимин тэрийэргэ ууруллуоҕа.
«Үрдүк үөрэх түмэлэ ХИФУ уонна Уһук Илиннээҕи университет аан дойду таһымыгар тахсыахтаахтар. Инникитин Уһук Илин олохсуйар былааннаах дьону Арассыыйа уонна аан дойду бастыҥ үөрэх кыһаларыгар босхо үөрэттэриэхтээхпит», — диэн эттэ Ил Дархан. Иккиһинэн, эдэр ыччат аан дойдуну кэрийэригэр, Арассыыйа уонна Азия, Чуумпу акыйаан эрэгийиэннэрин кыһаларыгар үөрэнэригэр кыах бэриллиэхтээх, ол иһигэр үлэни биэрээччи көмөтүнэн. «Сөмөлүөтүнэн магистральнай айаҥҥа көтөргө субсидияны олохтуурга эдэр ыччакка 30 саастарыгар диэри судаарыстыба сааһынан хааччаҕы кэҥэтэн биэриэн сөп. Ону таһынан, Уһук Илин киин куораттартан ыраах, тэйиччи сытарын быһыытынан, цифровой сайдыы өрө тутуллан, чуолаан манна урутаан уонна күүскэ сайдыахтаах», — диэтэ Айсен Николаев.
Уһук Илин дьону олохсутарга, кини этэринэн, олохтоох нэһилиэнньэни, чуолаан эдэрдэри үлэнэн хааччыйарга эбии үлэ ыытыллыахтаах. Холобур, «Звезда» суудуналары тутар киин уопутун туһанан, үлэһиттэр куортамнаан олороллоругар анаан, судаарыстыба көмөтүнэн чэпчэтиилээх дьиэ тутуллуон сөп. Инвестиционнай бырайыактары олоххо киллэрэргэ идэтийбит үлэһит илии тиийбэт буолуутун итинник быһаарыахха син.
«Оҕо төрөөтөҕүнэ, харчы төлөнөрүн курдук, аныгы уһуйааннарга уонна оскуолаларга 100% миэстэ баар буоларын судаарыстыба көрөн-истэн, хааччыйыан наада. Эдэр ыччат ортотугар дьиэ-уот саамай тыын кыһалҕатын быһаарарга бастакы усунуоһа суох 2%-наах ипотеканы кирэдьиит болдьоҕун устата киллэрэр уолдьаста. Маннык чэпчэтиини киллэрдэхпитинэ, эдэр дьон үчүгэй олоҕу көрдөөн, төрөөбүт тэлгэһэлэриттэн ыраах сиринэн тэлэһийэн, атын куораттарга бара сатыа суох этилэр. Оттон дойду үрдүнэн эдэрдэр Уһук Илин олохсуйа кэлэ сатыахтара», — диэн санаатын үллэһиннэ кини. Ил Дархан Айсен Николаев эдэр ыччаты өйүүргэ туһаайан эппит этиилэрэ киһи хапытаалын сайыннарарга, Уһук Илинтэн дьон көһөн барыытын тохтоторго сүрүн тирэх буолуохтара.
