Амма улууһугар Бүтүн Россиятааҕы тыа хаһаайыстыбатын биэрэпиһин тэрээһиннээхтик ыытар сыаллаах улуустааҕы хамыыһыйа уочараттаах мунньаҕар түмүктэри таһаардылар. Мунньаҕы хамыыһыйа бэрэссэдээтэлэ Прасковья Емельянова салайан ыытта.
Статистика салаатын салайааччыта Марина Васильева иһитинэрбитинэн, 2015 сыл отчуотуттан көрдөххө, улуус үрдүнэн хороҕор муостаахпыт ахсаана ааспыт сыллааҕар 1302 төбөнөн аччаабыт, ол оннугар сыспай сиэллээхпит 679 төбөнөн улааппыт. Сүөһү ахсаана ордук чааһынай ыалларга аҕыйаабыта бэлиэтэнэр.
Мунньахха кыттыыны ылбыт улуус кылаабынай зоотехнига Ион Кононов: «Аччааһын сүрүн биричиинэтинэн сүөһү тутар бааһынай хаһаайыстыбалар үлэлэрин тохтоппуттара, дьон сааһыран сүөһүнү кыайан көрбөт буолбутун кытта сибээстээх. Маны сэргэ ыччат сүөһү ортотугар дэҥтэн өлүү тахсар. Ол эрээри ааспыт сылы кытта тэҥнээтэххэ көнньүнэн өлүү аҕыйах. Ити түмүгэр үүтү туттарыы аччаата, ол оннугар эти туттарыыбыт үрдээтэ», — диэн эттэ.
— Кулун тутар 18 күнүгэр барыллааһын биэрэпис ыраах сытар нэһилиэктэргэ ыытыллыахтаах. Хаһаайыстыбата элбэҕинэн барыллааһын биэрэпиһи Олом Күөлүгэр ыытар буоллубут. Манна билигин 32 бааһынай хаһаайыстыба уонна 8 кэтэх хаһаайыстыба баар, — диэн этэр биэрэпис боломуочунайа Кристина Васильева.
Билиҥҥи туругунан бары нэһилиэктэринэн хаһаайыстыбаннай кинигэлэр бэрэбиэркэлэнэн, хаалбыт итэҕэстэри муус устар 5 күнүгэр диэри туоратыахтаахтар. Кэлэр мунньахха хамыыһыйа Сатаҕай уонна Соморсун нэһилиэктэрин бэлэмнэрин истэргэ быһаарда.
