Саха сирин боксера Василий Егоров Олимпиада мэтээлин иһин киирсииттэн туораата. Кини 20 саастаах американец Нико Мигель Эрнандеска хоттордо.
«Мин саныахпар, куһаҕана суох киирсии буолла. Вася дьоһуннук кииристэ. Ол эрээри американец үчүгэй охсуулары оҥордо. Биһиги бастакы рауну 100% кыайдыбыт, ол эрээри судьуйалар кыайыыны утарсааччыга биэрдилэр», — диэн суруналыыстарга интервьютугар боксаҕа Россия сүүмэрдэммит хамаандатын кылаабынай тренерэ Александр Лебзяк эттэ.
Василий Егоров бэйэтин спортка карьератыгар аан бастаан Олимпиада риингэтигэр таҕыста.
Бастакы рауҥҥа Егоров чопчу охсуулары оҥордо, ол эрээри американец охсуу аҥаарын көмүскэнэн мэһэйдэннэ. Эрнандес элбэҕэ суохтук оҕуста. Хомойуох иһин, судьуйалар кыайыыны АХШ бэрэстэбиитэлигэр биэрдилэр.
Кэлэр киирсиигэ судьуйалар куоластарын 100% Нико Эрнандеска биэрдилэр. Саха сирин спортсменыгар бэйэҕэ эрэнии тиийбэтэ.
Бүтэһик рауҥҥа Василий Егоров утарсааччытыгар күүстээхтик кимэн киирдэ уонна американец охсууларыттан табыгастаахтык көмүскэннэ. Судьуйалар санаалара уларыйбата: кинилэр кыайыыны 20 саастаах Нико Эрнандеска биэрдилэр. Василий Егоров Олимпиада мэтээлин иһин киирсииттэн туораата.
