Томпо улууһугар Кириэс Халдьаайы оскуолата барыларыттан кырдьаҕас үөрэх кыһатынан буолар. Былырыын 110 сааһын туолбута.
Быйыл бу үөрэх кыһатын туһунан саҥа кинигэ күн сирин көрдө. Урукку кэмтэн ыла бу бэһис кинигэ буолар. РФ уопсай үөрэхтээһинин Бочуоттаах үлэһиттэрэ, директор Александр Охлопков уонна Николай Охлопков хомуйан оҥорбуттар.
Урукку кинигэлэртэн биир уратытынан оскуола үлэтигэр олохтоох таҥара дьиэтин үлэһиттэрин, бастакы учууталлар Антонина Клиорина уонна репрессияҕа түбэһэ сылдьыбыт Гаврил Семенов туһунан матырыйааллар киирбиттэр.
Кинигэҕэ араас кэмҥэ үлэлээбит учууталлар уонна үөрэммит үөрэнээччилэр ахтыылара киирбит. 1970 сылтан үлэлээбит директордар, РСФСР үөрэҕириитин туйгуннара Наум Слепцов, Владимир Кутяркин, Екатерина Неустроева, РФ уопсай үөрэхтээһинин Бочуоттаах үлэһитэ Владимир Тимофеев уонна РФ үтүөлээх учуутала Александр Николаев ахтыылара бааллар. Үөрэммит сылларын туһунан техническэй наука доктордара Анатолий уонна Егор Степановтар, экономическай наука доктора Александр Пахомов уо.д. а. суруйбуттар.
Кинигэ сүрэхтэниитигэр улуус дьокутааттарын бэрэссэдээтэлэ Илья Шадрин, Кириэс Халдьаайы оскуолатыгар үөрэммит Ил Түмэн дьокутаата Дмитрий Саввин, Доруобуйа харыстабылын министрэ Михаил Охлопков, улуус баһылыгын солбуйааччы Петр Новгородов уо.д.а кыттыыны ыллылар.
Матырыйааллары хомуйууга оскуола коллектива үлэлээбит. Кинигэни «Көмүөл» кинигэ кыһатыгар Кириэс Халдьаайы оскуолатыгар үөрэммит Борис Павлов 500 тираһынан бэчээттээтэ. Үбүнэн көмөнү «Анаабыр алмаастара» ААТ гендиректора, Ил Түмэн дьокутаата Матвей Евсеев, улуус дьаһалтата (баһылык Георгий Герасимов) уонна Байаҕантай нэһилиэгин дьаһалтата (баһылык Яков Степанов), учууталлар оҥорбуттар.
Кинигэ иккис чааһа тахсарыгар матырыйааллар хомуллан сыталлар. Үбүлээһин быһаарыллыахтаах. Ол эрээри үөрүүлээх түгэҥҥэ олорон бачча элбэх үтүөлээх, үрдүк дуоһунастаах дьон бу кыһалҕаны түргэнник быһаарыахтара, бэйэлэрин тус кылааттарын киллэриэхтэрэ диэн санааҕа кэлэҕин.
Ааптар хаартыскаҕа түһэриитэ.
