РФ бэрэсидьиэнэ Владимир Путин 2012 с. таһаарбыт ыам ыйынааҕы ыйаахтарыгар хамнаһы үрдэтии биир сүрүн миэстэни ылар. Аны билигин тыа хаһаайыстыбатынан дьарыктанар дьоҥҥо болҕомто ууруллуоҕа.
Бу туһунан Ил Дархан Егор Борисов “Саха” НКИХ ханаалыгар быһа эфир кэмигэр иһитиннэрдэ. Санатан эттэххэ, Саха сиригэр бүддьүөт үлэһиттэрин хамнастара түһүмэҕинэн үрдээн кэллэ. Хамнаһы үрдэтии бүтэһигин былырыын төрдүс кыбаарталга уонна быйыл тохсунньуга ыытылынна. Итиннэ 60 тыһыынчаттан тахса киһи хабылынна. Ил Дархан бэлиэтииринэн, аны билигин тыа хаһаайыстыбатын эйгэтигэр үлэ барыахтаах.
“Биһиги өрөспүүбүлүкэбитигэр хамнас боппуруоһа билигин бүддьүөт, промышленность, тутуу, энергетика эйгэтин үлэһиттэригэр буолбакка, тыа хаһаайыстыбатынан дьарыктанар дьоҥҥо ордук сытыытык турар. Кинилэр кэлэктиибинэй дуогабарынан хамнас аахсаллар. Ол сүрдээх кыра: 15-30 тыһ. солк. тэҥнэһэр. Ону сэргэ бэйэлэрин хаһаайыстыбаларыттан дохуот аахсаллар. Ол учуоттаныллыбат. Онон тыа хаһаайыстыбатынан дьарыктанар дьоммут хамнастарын үрдэтиигэ улахан болҕомтобутун ууруохпутун наада. Бэҕэһээ бу туһунан Мэҥэ Хаҥалас улууһугар Тумул нэһилиэгэр тахса сылдьан кэпсэттим. “Тумул” ТХПК үлэһиттэрин кытары атах тэпсэн олорон дохуоттарын, туохха ночоотуралларын ырытыстыбыт. Тыа сиригэр хамнаһы хайдах үрдэтиэххэ сөбүн кэпсэттибит. Эбии дьаһаллары бэлиэтэниэхпит диэн түмүккэ кэллибит”, — диэн этэр кини.
