«Мин сир хаһаайынабын» диэн бырайыак кыттыылаахтара Саха Государственнай тыа хаһаайыстыбатын академиятыгар сырыттылар.
Бу бырайыакка тыа хаһаайыстыбатын сүрүн дьарык оҥостубут дьиэ кэргэттэр кытталлар. Төрөппүттэрин дьарыгын утумнуон баҕалаах эдэр ыччакка билиини, сатабылы иҥэрэр сыаллаах хамсааһыҥҥа билиҥҥитэ интэриэс киһи астынар гына көхтөөх буолбатах. Өрөспүүбүлүкэ үрдүнэн баара-суоҕа 12 ыал баар. Кинилэртэн икки ыал оҕолоро оскуоланы бүтэрбиттэр уонна тыа хаһаайыстыбатын анал үөрэҕи биэрэр кыһаларыгар үөрэнэ сылдьаллар.
Бырайыагы Үөрэҕириини сайыннарыы уонна үөрэх үлэһиттэрин идэни үрдэтэр института сүрүннүүр. Академияҕа буолбут көрсүһүүгэ Бырайыак көҕүлээччилэриттэн биирдэстэрэ, институт ыстаарсай преподавателэ Гаврил Адамов бу дьиэ кэргэттэри таба өйдөөн, тыа хаһаайыстыбатын сайыннарыы кэлим бырагырааматыгар уратытык суолталаан көмөлөһүөххэ наадатын ыйар. Бастакы проректор Семен Плотников академия көҕүлээһини өйүүрүн уонна бу хамсааһын оскуола саастаах оҕолорго аналлаах профориентационнай үлэ биир бастыҥ хайысхата буолуон сөбүн бэлиэтээтэ. Чопчу быһаарыыны ылынан тыа хаһаайыстыбатын дьоҕус бизнеһигэр киириэн, сүрүн дьарык оҥостуон баҕалаах ыччакка тус сыаллаах үөрэх миэстэтин аныырга туруорсуулар, сүбэнэн үлэлиир сомоҕолоһуу наадатын эттэ.
Чурапчы Мындаҕаайытыттан кэлбит Алина Егоровна, Петр Константинович Гермогеновтар уолаттара Петя уонна Гриша хара сарсыардаттан төрөппүттэрин кытта тэбис тэҥҥэ хаһаайыстыбаҕа үлэлииллэр. Кыыстара Финляндияҕа кийиит. Күтүөттэрэ дойдутугар ситиһиилээх фермер. Бу нэһилиэк оскуолата 2014 сылга агропрофилированнай хайысханы ылыммыта. Маннык хайысханан үлэлиир үгүс оскуола салайааччылара уонна учууталлар Россияҕа үөрэнээччи туһалаах общественнай үлэҕэ кыттыыта сөргүтүллэн эрэрин ураты болҕомтоҕо ылан биһирииллэрин биллэрэллэр. Аныаха диэри оҕону үлэнэн иитиини хааччахтаан турбут дойду сокуоннарын уларыта тутуу агропрофилированнай оскуола кыаҕын толору туһанарга, ыччат өйүн-санаатын иитиигэ үчүгэйдик эрэ сабыдыаллыахтара диэн бигэ эрэллээхтэр.
Мантан инньэ «Мин сир хаһаайынабын» эрэ бырайыак чэрчитинэн буолбакка, оҕоҕо тыа хаһаайыстыбатын анал үөрэҕин тэрийиигэ, үлэтин-хамнаһын сайыннарыыга бииргэ үлэлиир наадалааҕын быһыытынан, Саха Судаарыстыбаннай тыа хаһаайыстыбатын академията Үөрэҕириини сайыннарыы уонна үөрэх үлэһиттэрин идэни үрдэтэр институтун кытта сөбүлэһиини түһэрсиини көҕүлүөҕэ.
