27 Тохсунньу 27.01
  • -48°
  • $ 73,82
  • 83,32

Троеборьеҕа саха кыыһа Айыына Салышева чөмпүйүөннээтэ

17:02, 15 июля 2016
Текст:

Үс күн устата ыытыллыбыт саха национальнай ыстаныылара (кылыы, ыстаҥа, куобах) түмүктэннэ. Троеборьеҕа абсолютнай чөмпүйүөнүнэн Сибиир уола Дмитрий Бочкарев (113,02) буолла. Оттон кыргыттарга саха сирин хамаандатын лидера Айыына Салышева (60,76) эрэллээхтик чөмпүйүөннээтэ.


Саха сирин хамаандатын уолаттара Дмитрий Дмитриев (112,92) үрүҥ көмүс, Семен Никифоров (109,82) боруонса мэтээллэргэ тигистилэр.

Биһиги хамаандабыт уолаттара уонна кыргыттара бэйэлэрин кыахтарынан үчүгэйдик кытыннылар. Күрэхтэһии иннинээҕи көрдөрүүлэрин лаппа тупсардылар. Ол да буоллар барыта санаа хоту табыллыбата. Атын да хамаандалар бэлэмнэрэ, кыахтара таһыччы буолан биэрдэ. Сибиир, Уһук Илин, Казахстан спортсменнара кыайыыга чырапчыланан кэлбиттэрэ харахха быраҕыллар. Кинилэр куобахха эрэ ыарырҕаттылар уонна техникаларын бу көрүҥҥэ баһылыы иликтэрэ мэһэйдээтэ.

Уолаттарга кылыыга, ыстаҥаҕа Сибиирдээҕи федеральнай уокуруктан Дмитрий Бочкарев, кыргыттарга Казахстантан Татьяна Овчинникова, Азербайджантан Фалрия Тагидазе кыахтаахтык кытыннылар.

Троеборьеҕа кыргыттарга биһиги хамаандабыт лидера Светлана Макарова бастыа дии санаабыппыт да, куобахха кыайан хомуллан ыстаммата. Кини оннугар Айыына биир тэҥник кыттан бастаан үөртэ.

«Аҕыс хамаанда кыттар диэн этэ да, сорохтор суруттаран баран ситэ кыттыбатылар. Сүүрүүнү кытта тэҥҥэ буолан, онно мэһэйдэттилэр. Атын күҥҥэ буолбута эбитэ буоллар, элбэх спортсмен буолуон сөп этэ», — диэн Саха сирин национальнай ыстаныыларыгар хамаандатын салайааччыта Дмитрий Наумов санаатын үллэһиннэ.

0
0
27 января 27.01
  • -48°
  • $ 73,82
  • 83,32