Сирия хамаандата «Орто дойду» зоопаркаҕа сырытта. Эдэр спортсменнар Саха сирин кыылын-сүөлүн эйгэтин кытта билсиһииттэн үөрдүлэр.
Зоопаркаҕа оҕолор болҕомтолорун ордук кыталык, кыһыл саһыл уонна, биллэн турар, Колымана уонна Ломоносов эһэлэр ыллылар.
«Кыталыктар тустарынан кинигэҕэ эрэ ааҕан билэрбит, билигин илэ көрөн баран, чахчы кыраһыабай көтөр буоларын биллибит», — диэтилэр оҕолор. Кинилэр өссө хотугу таба таһыгар сөбүлээн хаартыскаҕа түстүлэр.
Экскурсия кэнниттэн хамаанданы «Орто дойду» рестораҥҥа ыҥырдылар, манна кинилэри айылҕа харыстабылын миниистирэ Сахамин Афанасьев көрүстэ.
«Олимпийскай эрэллэри Саха сиригэр уруйдуубут! Биһиги эһиги тускутугар Оонньуулар тухары «ыарыйдыбыт», ситиһиилэргититтэн үөрдүбүт. Бары кыайыыга дьулуургутун, спортивнай майгыгытын, бэлэмҥитин көрдөрдүгүт. Манна эһиги тренердэргит үтүөлэрин бэлиэтиибин. Күндү доҕоттор, сотору эһиги дойдугутугар, күннээх Сирияҕа төннүөххүт, онно Саха сирин кырачаан эттигин бэйэҕитин кытта илдьэ барыаххыт. Оонньуу, Саха сирин туһунан куруук саныаххыт, биһиги эмиэ эһигини умнуохпут суоҕа», — диэтэ миниистир.
Ыалдьыт оҕолор киэн туттан туран, бэйэлэрин өрөгөй ырыаларын ыллаатылар. «Эһигини Сирияҕа күүтэбит. Баһаалыста ыалдьыттыы кэлиҥ», — диэтилэр.
Бу туһунан айылҕа харыстабылын министиэристибэтин пресс-сулууспата иһитиннэрдэ.
