29 Сэтинньи 29.11
  • -33°
  • $ 60,75
  • 63,3

Сардана Трофимова норуоттар икки ардыларынааҕы күрэхтэһиилэргэ кыттар быраабы ситистэ

10:05, 23 ноября

Сардана Трофимова аан дойдутааҕы чэпчэки атлетика федерациятын ассоциациятын быһаарыытынан норуоттар икки ардыларынааҕы стартка кыттар мэктиэлэннэ, туһааннаах докумуон оҥоһулунна. Ол эрээри, официальнай күрэхтэһиигэ кыттарга бүтэһиктээх быһаарыы норуоттар икки ардыларынааҕы олимпийскай кэмитиэт ылыныаҕа. Бу туһунан СИА-ҕа спортсменка личнэй тренерэ Татьяна Жиркова иһитиннэрдэ.

«Сардаана аан дойду күрэхтэһиитигэр официальнайдык кыттар мэктиэлэннэ, оттон билигин IAAF норуоттар икки ардыларынааҕы олимпийскай кэмитиэтигэр туһааннаах сурук ыытыахтаах. Онно киниэхэ официальнай күрэхтэһиилэргэ — аан дойду чемпионатыгар, Олимпийскай оонньууларга кыттар быраабы бириэхтээхтэр. Бу балай эмэ бириэмэни ылыа дии саныыбын, үтүө быһаарыыны ылыахтара диэн эрэнэбит. Билигин биһиги бэлэммитин, сбордарбытын, күрэхтэһиилэрбитин саҕалаан эрэбит. Сүрүн сорукпут- Олимпийскай оонньуулар», — диэн иһитиннэрдэ Татьяна Жиркова.

Санатан эттэххэ, 34 саастаах Сардаана Трофимова бу сылтан Кыргызстан аатыттан күрэхтэһэр. Алтынньы бүтүүтэ кини Франкфуртскай марафоҥҥа кыттан топ- 6 бастыҥ сүүрүктэр ахсааннарыгар киирбитэ.

Следите за самым важным и интересным в Telegram-канале и WhatsApp-группе ЯСИА
1
0