Россия атлеттара Олимпиадаҕа кыттыылара бобуллунна. Кинилэр ортолоругар, биллэрин курдук, Саха сирин сүүрүүгэ, үөһээ Бүлүүттэн төрүттээх Сардаана Трофимова баар. Кини этии киллэрэллэрэ буоллар, норуоттар икки ардыларынааҕы Олимпийскай кэмитиэт былааҕын аннынан күрэхтэһэргэ сөбүлэһиэх этэ. Ити туһунан кини СИА-ҕа эттэ.
«Допиҥҥа «ыраас” спортсменнары Олимпийскай оонньууларга киллэрбэккэ ИААФ улахан алҕаһы оҥордо. Биһиги тренердэрбитин кытта элбэх сырабыт халтайга хаалла. Олимпиада туһугар аан дойду чемпионатыттан аккаастанарга күһэллибитим. Допиҥҥа тутуллубатах спортсменнары күрэхтэһиигэ кытыннарыахтара диэн бүтэһигэр тиийэ эрэммиппит», — диир кини.
Лозанна куоракка буолбут арбитражнай суут Россия атлеттарын Рио-де-Жанейроҕа ыытыллар Олимпийскай оонньууларга киллэрбэтэҕин санатар оруннаах. ИААФ Россия чэпчэки атлетикаҕа хамаандатын туоратар туһунан быһаарыыта күүһүгэр хаалла.
«Атырдьах ыйыгар дойдубар кэлиэм. Ол иннинэ Екатеринбург куоракка ыытыллар марафоҥҥа Россия Кубогар күрэхтэһиэм», —диир кини.
Сардана Трофимова Франкфурт куоракка 42 км. сүрүүгэ кыайыытын иһин Олимпиадаҕа кыттар үрдүк чиэскэ тиксибитэ. Бу күрэхтэһиигэ кини көрдөрүүтэ (2 чаас 24 мүн.) этэ. ИААФ быһаарыыта тахсыан иннинэ кини тренерин кытта Олимпиадаҕа бэлэмнэнэ сылдьыбыта.
«Социальнай ситимнэр нөҥүө миэхэ өйүүр тылы элбэҕи суруйаллар. Барыларыгар махталбын тиэрдэбин. Наһаа санааҕытын түһэримэҥ! Тренерим Татьяна Жиркова уонна мин туспутунан өссө да истиэххит», —диэтэ Сардаана Трофимова.
