«Азия оҕолоро» VI аан дойдутааҕы спортивнай оонньуу чэрчитинэн ыытыллар «Планетаҕа үҥкүү бырааһынньыга» диэн култуурунай тэрээһиҥҥэ «Саха сирин бриллианнара» оҕо үҥкүүтүн ансаамбылын улахан кэнсиэрэ буолан ааста.
«Ороһуостуба сулустара-2016» диэн Москваҕа ыытыллыбыт норуоттар икки ардыларынааҕы куонкуруска, Сочитааҕы «Көмүс нота-2015» I Бүтүн Арассыыйатааҕы бэстибээлгэ гран-при курдук бириэмийэлэри ылбыт ааттаах-суоллаах үҥкүү бөлөҕө үгүс көрөөччүнү түмтэ. Ансаамбыл салайааччылара — РФ уонна СӨ үтүөлээх артыыһа Афанасий Соловьев уонна СӨ үтүөлээх артыыһа Зоя Соловьева, бөлөх дириэктэрэ СӨ култууратын уонна үөрэҕин туйгуна Елена Ылахова.
Оҕолор олус сөбүлээн уонна табыллан үҥкүлүүр «Экспозиция», «Быйаҥ», «Сайын», «Хула хула», «Корейскай», «Уйгурскай», «Тувинскай», «Китайскай», «Индийскэй» үҥкүүлэрэ көрөөччүлэр биһирэбиллэрин ылыан ылла. Оттон «Куклы», «Северный», «Финская полька» курдук үҥкүүлэр бастыҥнарынан ааттаннылар. Ансаамбыл кырачаан үҥкүүһүттэрэ бу күн эмиэ «күннээтилэр». Араас таһымнаах үҥкүү куонкурустарын лауреата Лиза Князева нуучча народнай үҥкүүтүн толордо.
— Быйыгы сылга бу биһиги үһүс улахан кэнсиэрбит. Бастакы кэнсиэрбит Сергей Зверев аатынан үҥкүү национальнай ансаамбылын кытта Үҥкүү күнүгэр, Иккис улахан кэнсиэр Туймаада Ыһыаҕар буолбуттара. Уонна бу үһүс кэнсиэрбит «»Азия оҕолоро» VI аан дойдутааҕы спортивнай оонньуу чэрчитинэн ыытылынна. Ону таһынан бу суолталаах тэрээһин аһыллыытын уонна сабыллыытын үҥкүүлэригэр кытта сылдьабыт. Биир сыл иһигэр үс улахан кэнсиэри толоруу — дьаныардаах үлэбит түмүгэ. Ол онтон оҕолор да, үҥкүү бөлөҕүн салайааччылара да, төрөппүттэр да улахан дуоһуйууну ылабыт. Иннибитигэр өссө да кэскиллээх былаан үгүс, — диэн санаатын үллэстэр «Саха сирин бриллианнара» ансаамбыл салайааччыта Афанасий Соловьев.
