Бэҕэһээ Анаабыр улууһун Сааскылааҕар ньиэп ыскылаатыгар тахсыбыт баһаар умулунна. Билигин быһылаан содулун суох оҥоруу үлэтэ барар. Бастакы вице-премьер Алексей Колодезников эппитинэн саахал нэһилиэк олоҕор охсуо суоҕа, эбии оттугу кыһыҥҥы суолунан аҕалыахтара диэн СИАҕа Ил Дархан уонна Бырабыыталыстыба пресс-сулууспата иһитиннэрэр.
Бэҕэһээ Ил Дархан Айсен Николаев сорудаҕынан СӨ бырабыыталыстыбатын бэрэссэдээтэлин бастакы солбуйааччы Алексей Колодезников салайааччылаах суһал бөлөх Сааскылаахха көппүтэ. МЧС, быыһыыр сулууспа үлэһиттэрэ, баһаарынайдар түүнү быһа баһаары умулуннарыыга үлэлээбиттэрэ.
Алексей Колодезников Анаабыр улууһун уонна Сааскылаах дьаһалтатыгар кэмигэр сөпкө дьаһаммыттарыгар, чугас турар дьиэлэр олохтоохторун көһөрбүттэригэр, аһылыгынан хааччыйбыттарыгар махталын тиэртэ. Вице-премьер махталын МЧС, быыһыыр сулууспа үлэһиттэригэр, баһаарынайдарга эмиэ биллэрдэ. «Кэмигэр сөпкө дьаһаныы түмүгэр нэһилиэккэ, ниэп ыскылаатыгар тахсыахтаах алдьархайы тохтоттубут«, — диэтэ кини.
Вице-премьер ыскылаакка хаалбыт гаас конденсатын саппааһа 2021 сыл саҥатыгар диэри тиийиэҕин, эбии оттугу кыһыҥҥы суолунан тиэрдиэхтэрин эттэ.
