15 От ыйа 15.07
  • 29°
  • $ 87,74
  • 95,76

Николай Дегтярев: Рио Оонньууларыгар Саха сирин спортсменнара кыһыл көмүс мэтээллэри ылалларын мэһэйдээтилэр

15:17, 24 августа 2016
Текст:
Читайте нас на
Яндекс Новости
ЯДВ

Рио Оонньууларыгар Саха сирэ кыһыл көмүс мэтээллэри ыларын мэһэйдээтилэр. Биһиги паралимпиецтарбыт бары Олимпиада үрдүк үктэлигэр тахсар толору кыахтаахтара. Ити туһунан СИА-ҕа өрөспүүбүлүкэ Паралимпийскэй кэмитиэтин салайааччыта Николай Дегтярев эттэ.


«Биһиги спортсменнарбыт бары ситиһиилэрин муҥутуур чыпчаалыгар сылдьар кэмнэрэ. Онон булгуччу мэтээллэри ылаллара хаалла. Биһиги атлеттарбытын чөмпүйүөннэр, дьиҥнээх Дьоруойдар курдук көрсүөхтээхпит», — диир кини.

Харбааһыҥҥа Анастасия Диодорова — Пекиннээҕи Паралимпиадаҕа үрүҥ көмүс мэтээли ылбыта, атлет Владимир Балынец —пауэрлифтердар ортолоругар бастыҥ, волейболистка Алена Дмитриева — Европа вице-чөмпүйүөнэ, Степанида Артахинова — оҕунан ытыыга аан дойду түөрт төгүллээх кыайыылааҕа, рекорду олохтообута.

«Билигин Оонньууларга киллэриллибэтэх атлеттарга күрэхтэһии ыытар туһунан кэпсэтиһии бара турар. Кинилэр көрдөрүүлэрин Паралимпиадҕа ситиһиллибити кытта тэҥнээн көрүөх этибит», — диир кэмитиэт бэрэссэдээтэлэ.

Норуоттар икки ардыларынааҕы паралимпийскай кэмитиэт (IPC) баһылыга Филип Крэйвен Россия спортсменнарын Олимпиадаттан туоратар туһунан туруорсуута атырдьах ыйын 7 күнүгэр өйөммүтэ. Россия паралимпийскай кэмитиэтэ маны утарбыта эрээри, быһаарыы уруккутунан хаалла.

XV-с Паралимпийскай сайыҥҥы оонньуулар балаҕан ыйын 7-18 күннэригэр Рио-де-Жанейро куоракка мусталлар. 176 дойдуттан 4 тыһыынчаттан тахса спортсменнар ортолоругар спорт 22 көрүҥэр мэтээл 528 кэмпилиэгэ оонньонуоҕа.

Следите за самым важным и интересным в Telegram-канале и WhatsApp-группе ЯСИА