7 Алтынньы 07.10
  • -4°
  • $ 60,25
  • 58,24

Пушкинскай картаны туһаныы элбэх кыаҕы биэрэр

Бүлүүтээҕи П.Х.Староватов аатынан кыраайы үөрэтэр музей Пушкинскай картаны өрөспүүбүлүкэ музейдарыттан биир бастакынан киллэрдэ. Итинэн сибээстээн кыраайы үөрэтэр музей дириэктэрэ Татьяна Николаевна Афанасьева Сунтаар улууһугар үс күннээх билии-көрүү айанын тэрийбиттэрин туһунан маннык кэпсээтэ:

— Пушкинскай картаны туһаныы оҕолор төрөөбүт дойдуларын устун айанныылларыгар, чинчийэллэригэр кыаҕы биэрдэ. Ол курдук, оскуола улахан саастаах оҕолоругар анаан «Кыраайы үөрэтээччи П.Х.Староватов сылдьыбыт сирдэринэн» диэн бырайыагынан үс күннээх билии-көрүү айанын Сунтаар улууһун Элгээйитигэр уонна Кэмпэндээйигэ тэрийдибит.

Кэмпэндээйи туус баайдаах буолан 17-с үйэттэн саҕалаан элбэх чинчийээччи болҕомтотун тарпыт сир. П.Х.Староватов Кэмпэндээйигэ хаста да сылдьыбыта биллэр. Кини Элгээйигэ 1907-1913 сс. Сунтаар икки кылаастаах оскуолатын сэбиэдиссэйинэн үлэлиир кэмигэр кыраайы үөрэтиинэн дьарыгын саҕалаабыта. Ити кэмҥэ аан бастаан Кэмпэндээйигэ сылдьыбыт буолуон сөп.

Бүлүүлэр биир киэн туттар киһибит, музейбытын төрүттээбит биллиилээх кыраайы үөрэтээччибит, Үлэ Геройа эһиил 2023 сылга төрөөбүтэ 150 сылын бэлиэтиэхпит. Ол чэрчитинэн былааннаах үлэ тиһигин быспакка бара турар. Олортон биирдэстэрэ бу бырайыакпыт буолар: эдэр көлүөнэ ыччаты музей ыытар үлэтигэр сыһыарыы, П.Х.Староватов олоҕун, үлэтин билиһиннэрэр сыаллаах төрөөбүт кыраайбыт устун айан, — диэн бэлиэтээтэ музей дириэктэрэ Татьяна Афанасьевна.

Бэлэмнээтэ Николай Федоров
Олох Суола

Следите за самым важным и интересным в Telegram-канале и WhatsApp-группе ЯСИА
0
0
Тутаах тыллар