Орто уонна Аллараа Халыма улуустарын ДьКХ тэрилтэлэрин хамаандалара Черскэйгэ ыытыллыбыт V-с спартакидаҕа спорт аҕыс көрүҥэр күрэхтэстилэр. Эрийсиилээх киирсиилэр кэннилэриттэн орто халымалар кыайыы өрөгөйүн биллилэр.
Кинилэр күрэхтэһии бастакы күнүттэн остуол тенниһигэр, дуобакка, саахымакка утарсааччыларын тута кыайдылар.
Күрэхтэһии иккис күнүгэр мас тардыһыытыгар, хапсаҕайга илин-кэлин түһүстүлэр. Манна Аллараа Халыма хамаандата хапсаҕайга кыайыы үөрүүтүн биллэ.
Волейболга, мини-футболга хатыйсылаах киирсиилэр буоллулар. Бүтэһигэр хамаандалар биир тэҥ ахсааны ситистилэр. Тус кыайыыларынан Орто Халыма улууһун хамаандата ордон таҕыста, онон бастакы миэстэ кинилэргэ бэрилиннэ.
