17 Тохсунньу 17.01
  • -48°
  • $ 73,82
  • 83,32

Николай Константинов: Сахалар мас тардыһыытыгар Европа чемпионатыгар «кыһыл көмүһү» ылар кыахтаахтар

15:17, 19 июля 2016
Текст:

Мас-рестлиҥҥэ биир үксүн сахалартан сүүмэрдэммит Россия хамаандата Европа чемпионатыгар кыһыл көмүс мэтээлгэ суоттаныан сөп. Итинник санааны хамаанда кылаабынай тренерэ Николай Константинов этэр. Күрэхтэһии от ыйын 21-25 күннэригэр Грузия Батуми куоратыгар буолар.


«Ыйааһыннарга барыларыгар Россия кыһыл көмүс мэтээл иһин киирсиэҕэ. Белоруссия, Украина уонна Грузия хамаандаларын күүстээх утарсааччылар ахсааннарыгар киллэриэххэ сөп. Кинилэр спортсменнара эт-хаан өттүнэн туруктара, физическэй бэлэмнэрэ олус үчүгэй. Дойду сүүмэрдэммит хамаандатын састаабыгар биһиги бастыҥтан бастыҥ мадьыныларбыт киирдилэр. Онон, күрэхтэһии олус сытыы, чаҕылхай буолара күүтүллэр. Уопсай хамаанда зачетугар биһиги бастакы миэстэни ылыахпыт дии саныыбын», —диэн СИА-ҕа Николай Константинов эттэ.

Россияттан Европа чемпионатыгар икки хамаанда киирсэр. Оттон күрэхтэһии Грузияҕа буоларынан, кинилэр хас биирдии ыйааһыҥҥа үс атлеты кытыннарар бырааптаахтар.

Россия бастакы хамаандатын састаабыгар киирдилэр: Сергей Черкашин (60 кг диэри), Артур Орлов (70 кг диэри), Семен Атаков (80 кг диэри), Егор Баишев (90 кг диэри), Анатолий Баишев (125 кг диэри), Сергей Фролкин (125 кг үөһэ). Хамаандаҕа атын регионтан соҕотох спортсмен киирдэ: Хабаровскайтан Иван Захаров (105 кг диэри).

Дьахталларга дойду чиэһин Сардана Осипова (55 кг диэри), Ирина Севрюк (65 кг диэри), Яна Захарова (75 кг диэри) көмүскүөхтэрэ. Кинилэр бары Саха сириттэн. Кабардино-Балкарияттан Кристина Кочесокова (85 кг диэри) Свердлвскайтан Светлана Тихонова (85 кг диэри) бааллар.

Дойду иһигэр ыытыллыбыт чемпионат түмүгүнэн хамаанда талыллыбыт. Кыһыл көмүс мэтээли ылбыттар аан дойду таһымыгар ыытыллар чемпионакка кытталлар, оттон үрүҥ көмүс мэтээллээхтэр — Европаҕа.

Евгений Удин (60 кг диэри), Михаил Ковалик (70 кг диэри), Семен Готовцев (80 кг диэри), Евгений Пиконин (90 кг диэри), Василий Алексеев (105 кг диэри), Михаил Гоголев (125 кг диэри), Андрей Маркин (125 кг үөһэ), Анна Неустроева (55 кг диэри), Екатерина Белолюбская (65 кг диэри), Мария Лоцик (75 кг диэри), Акулина Уарова (85 кг диэри), Евгения Гарникова (85 кг үөһэ) резервэ састаабыгар бааллар.

0
0
Тутаах тыллар
17 января 17.01
  • -48°
  • $ 73,82
  • 83,32