24 Олунньу 24.02
  • -37°
  • $ 92,75
  • 100,44

Үүнэр көлүөнэ тыйаатырыгар сахалыы саҥарар устуудьуйаҕа оҕолору сүүмэрдээһин буолла

16:01, 09 февраля
Текст:
Хаартыска: Ааптар тиксэриитэ
Читайте нас на
Яндекс Новости
ЯДВ

Саха Өрөспүүбүлүкэтин Үүнэр көлүөнэтин судаарыстыбаннай тыйаатырыгар Арассыыйаҕа Дьиэ кэргэн сылын, Саха сиригэр Оҕо саас сылын, Култуура тэрилтэлэригэр оҕо тыйаатырга дьоҕурун сайыннарыы сылын чэрчитинэн, сахалыы саҥарар оҕону тыйаатырга уһуйар устуудьуйаҕа кастинг буолла.

Саха Өрөспүүбүлүкэтин Үүнэр көлүөнэтин судаарыстыбаннай тыйаатырын салайааччылара, Арассыыйа култууратын үтүөлээх үлэһиттэрэ Матрена Степановна, Алексей Прокопьевич Павловтар, саҥа арыллар «Тулалыыр эйгэбэр аһаҕаспын, бэйэбэр арыллабын…» сахалыы саҥарар оҕо тыйаатырга дьоҕурун сайыннарар устуудьуйа салайааччыта Саха Өрөспүүбүлүкэтин үтүөлээх артыыһа Мария Никитична Данилова, уһуйааччылара Саха Өрөспүүбүлүкэтин үтүөлээх артыыстара Анна Васильевна Флегонтова, Марина Валериевна Корнилова уонна Саха Өрөспүүбүлүкэтин култууратын туйгуна, Үүнэр көлүөнэ тыйаатырын сүрүн худуоһунньуга уонна режиссера Прасковья Дмитриевна Павлова оҕолору уонна төрөппүттэрин кытта аһаҕас кэпсэтии быһыытынан сүүмэрдээһин ыыттылар.

Сахалыы саҥарар оҕолору артыыстыыр дьоҕурдарын арыйар устуудьуйа тыйаатыр умсугутуулаах эйгэтигэр киллэрэр, артыыстыыр маастарыстыба кистэлэҥнэрин үөрэтэр, саҥарар-иҥэрэр ускуустубаны баһылыырга уһуйар, сыанаттан куттаммат буоларга эрчийэр, оҕо дьиҥ ис кыаҕын арыйар сыаллаах-соруктаах үлэтин саҕалыа.

Сүүмэрдээһин кыттааччылара — Дьокуускай куорат оскуолаларын сахалыы саҥарар 1-11 кылаас үөрэнээччилэрэ. Сүүмэрдээһин кэпсэтии быһыытынан барда. Оҕолор сахалыы саҥарар, ааҕар уонна кэпсиир дьоҕурдарыгар болҕомтолорун уурдулар.

Сүүмэрдээһиҥҥэ кэлбит оҕолор үрдүк сыанаҕа, киинэҕэ көрөр артыыстарын кытары биир хоско олроллоруттан олус долгуйдулар уонна үөрдүлэр. Устуудьуйаҕа талыллыбыт оҕолор үөрүүлэрин көрөн, Үүнэр көлүөнэ тыйаатырын артыыстара сэргэхсийэн, тэҥҥэ үлэлэһэр, айар-тутар санаалара эбии бөҕөргөөтө.

Оҕолор үөрэнэр бириэмэлэригэр сөп түбэһиннэрэн, икки бөлөххө арахсан, нэдиэлэҕэ иккитэ дьарыктаныахтара.

Арассыыйа култууратын үтүөлээх үлэһиттэрэ Матрена уонна Алексей Павловтар салайааччылаах Саха   Өрөспүүбүлүкэтин Үүнэр көлүөнэтин судаарыстыбаннай тыйаатырын саҥа уһуйуллааччыларыгар, сөбүлээн талбыт дьарыктара төһүү күүс буолан, үрдүктэн үрдүк үгүс ситиһиилэргэ тиэрдэригэр баҕарабыт, суруйда Үүнэр көлүөнэ тыйаатырын пресс-сулууспата.

Следите за самым важным и интересным в Telegram-канале и WhatsApp-группе ЯСИА