Дьокуускайга «Мир! Май! ГТО!» өрөспүүбүлүкэтээҕи бэстибээл түмүктэннэ. Нуормалары туттарыыга 5116 киһи кытынна. Өрөспүүбүлүкэ олохтоохторо V-тан XVIII бөлөххө саастарынан арахсан, алта көрүҥнээх комплекс тургутуутун толордулар.
Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Анатолий Семёнов кыһыл көмүс бэлиэни ылары ситистэ уонна бары олохтоохтору кини холобурун батыһарга ыҥырда.
Хас да көлүөнэ Саха сирин дьоно бэйэтин күүһүн тургутан көрдө. «Якутскэнерго» публичнай акционернай уопсастыба старшай маастара Дмитрий Устинов аан бастаан кыттан, тута кыһыл көмүс бэлиэни ылары ситистэ. Аэропорт үлэһитэ Лена Ефимова бэлиэтииринэн, ГТО — бэйэ күүһүн тургутуу уонна тулалыыр дьоҥҥо, оҕолорго үтүө холобур. Евдокимовтар дьиэ кэргэн (Мария Алексеевна — 71 саастаах, Павел Павлович — 72 саастаах) эмиэ кыһыл көмүс бэлиэлэри ыллылар. Кинилэр этэллэринэн, ханнык да сааска чэгиэн-чэбдик буолуу суолталаах, ГТО хамсааһыныгар кыттааччы ахсаана сыллата эбиллэн иһэрэ үөрдэр. Кроссфит тренерэ Егор Старков кыһыл көмүс нуормалары мэлдьи туттарар, киниэхэ бу күүһүн уонна тулуурун тургутарга саҥа кыах.
Комплекс тургутуулара «Туймаада» стадиоҥҥа, Киин култуура уонна сынньалаҥ пааркатыгар уонна «Чолбон» сөтүөлүүр бассейнҥа ыытылыннылар. Бэстибээл чэрчитинэн кыттааччыларга «Доруобуйа дьаарбаҥката» тэрилиннэ.
Судьуйалар коллегияларын үлэтин ГТО Бүтүн Арассыыйатааҕы физкультурнай-спортивнай киинин өрөспүүбүлүкэтээҕи киинин начаалынньыга Ариян Александров салайда. Тэрээһини Саха Өрөспүүбүлүкэтин физическэй култуураҕа уонна спорка министиэристибэтэ ыытта.
