Арассыыйаҕа үлэ, социальнай сайдыы миниистирэ Максим Топилин Дьокуускайга тутулла турар инбэлиит оҕолор доруобуйаларын чөлүгэр түһэрэр кииҥҥэ сырытта. «Хааччаҕа, мэһэйэ суох эйгэ» бырагырааманы олоххо киллэриигэ Саха сирэ атын регионнарга холобур буолуон сөбүн кини бэлиэтээн эттэ.
Бассейн, спорт саалата, сылгы хаһаата, ыалдьыттар дьиэлэрэ — ити барыта тутулла турар эбийиэк бырайыагар баар. Тутуу 250 миэстэлээх, 12,5 тыһ. кв. м иэннээх. Манна миниистир уонна Саха сирин баһылыга Егор Борисов сырыттылар.
Ил Дархан эппитинэн, эбийиэги тутууга үүнэр көлүөнэ фондатын үбэ-харчыта улахан оруолу ылбыт. Бүгүҥҥү күҥҥэ ити фондаттан уопсайа 660 мөл.солк. туһаныллыбыт. Тутууну бүтэрэргэ 400 мөл. солк. наада. Егор Афанасьевич фонда көмөтө тутаах суолталаммытын ойуччу тутан эттэ.
Истэллэригэр, көрөллөрүгэр, хамсаналларыгар кэһиллиилээх оҕолорго анаммыт киини тутуу 2014 сыллаахха саҕаламмыта. Техническэй сакаасчыт — «Адгезия» ХЭТ, генеральнай бэдэрээччит – «Силим» ХЭТ. Тутуу бырайыагын олохтоох «Утум» тэрилтэ оҥорбут.
Өрөспүүбүлүкэ үлэҕэ, социальнай сайдыыга миниистирин солбуйааччы Зинаида Максимова этэринэн, манна инникитин алын сүһүөх оскуола аһыллыаҕа. Оҕолору кытта 289 исписэлиис үлэлиэҕэ.
Максим Топилин тутулла турар кииҥҥэ оҕолор төрөппүтэрин кытта бииргэ олорууларын ыйыталаста. Онуоха эппиттэринэн, төрөппүттэргэ анаммыт 30 миэстэлээх гостиница тутулла турар. Кинилэр манна босхо олоруохтара.
Эбийиэккэ сырыы кэнниттэн миниистир инбэлиит оҕолору доруобуйаларын тупсарыыга, үөрэтиигэ бастыҥ технологиялар туттуллуохтаахтарын туһунан эттэ.
«Бу Уһук Илиҥҥэ биир бастыҥ киин буолуоҕар бүк эрэнэбин. Инбэлииттэр мэһэйэ суох сылдьар эйгэлэрин үөскэтиигэ Саха сирэ Арассыыйа атын регионнарыгар холобур буолуон сөп«, — диэтэ Максим Топилин.
