Горнай улууһун Маҕарас оскуолатын 5 кылааһын үөрэнээчилэрэ 2015-2016 үөрэх дьылыгар ыытыллыбыт «Бастыҥ кылаас» куонкуруска бастаан, 18 тыһ. солк. сертификатынан наҕараадаланнылар. Оҕолор Сиинэ пааркатын көрө барар путевка ыллылар.
Былырыын эмиэ оскуола иһинэн ыытыллар «Бастыҥ кылаас» күрэҕэр бастаабыттара. Онно 10 тыһыынча солкуобайдаах сертификатынан наҕараадаланан, Дьокуускай куорат бастыҥ миэстэлэринэн күүлэйдээбиттэрэ. «Кылааспыт наһаа иллээх, көрдөөх, көхтөөх. Дьокуускай куоракка күүлэйдээн кэллибит. Царство вечной мерзлоты, «Черепашки ниндзя» киинэҕэ, болуоссаттарга сылдьыбыппыт, хаартыскаҕа түспүппүт», — Лиза Петрова кэпсиир.
Оҕолор ааспыт үөрэх дьылыгар оскуола иһигэр ыытыллыбыт мероприятиеларга, куонкурустарга ситиһиилээхтик кыттыбыттар. Оскуолалара агрохайысхаллаах буолан уруогу таһынан кылаастарын туһатыгар туттарга харчы киллэрэргэ кыһаллаллар. Төрөппүттэрин кытта дьаарбаҥка тэрийэллэр, саас сибэкки арассаадатын олордон атыылыыллар.
Үөрэхтэрин түмүктүүллэригэр нэһилиэнньэҕэ концерт көрдөрөн, бииргэ үөрэнэр дьүөгэлэрин балта эмтэнэригэр көмөлөспүттэр. Итиэннэ сэрии кэминээҕи оҕолорго, билигин эбээ буолан олорор үлэ, тыыл бэтэрээннэригэр Контоева Мария Степановна, Андреева Варвара Николаевна дьиэлэригэр баран концертаабыттар, кинилэр ахтыыларын ылбыттар. «Кылааспытыгар «Харыстааҥ ветераннары» ырыанан видеоклип уһуллубут. Бу манна барытыгар төрөппүттэрбит, учууталбыт күүс-көмө буоллулар. Үөрэҕи таһынан дьарыкка бары көхтөөхтүк кыттабыт. Кылааспыт иһинэн «Танцуем вместе», «Кинигэ киһи доҕоро», «Хомус», «Уол аҕатынаан» бырайыактар үлэлээтилэр. Өссө бөлөхтөрүнэн «Кэскил» хаһыакка майгыннатан «Доҕор», «Сулусчаан», «Үрүйэчээн» хаһыаттары оҥорон таһаардыбыт. Биир саамай өйдөөн хаалбыт түгэммит — Бэрдьигэстээххэ Чысхааны уонна Татарстан Тымныы Оҕонньорун Кыш Бабайы кытта көрсүһүү буолар. Биһиги онно А.С. Пушкин «Сказка о царе Салтане» остуоруйаны көрдөрбүппүт«, — диэн кэпсиир көхтөөх кылаас лидерэ кыыс.
Кылаастарыгар улууска, өрөспүүбүлүкэҕэ хайыһарга, атах оонньуутугар бириистээх миэстэлэри ылар оҕолордоохтор: Тимур Андреев, Кожеваткина Венера. Кыргыттар бары үҥкүү, фитнес куруһуогар дьарыктаналлар. Өрөспүүбүлүкэтээҕи фитнес-аэробика күрэҕэр 2 м. буолбуттар. Төһө кыалларынан араас таһымнаах олимпиадаларга, куонкурустарга, ааҕыыларга кытталлар. Лена Ноговицына өрөспүүбүлүкэтээҕи викториналар кыайылааҕа. «Новый урок» Россиятааҕы конкурска Лиза Петрова, Лена Ноговицына, Витя Колодезников, Катя Павлова лауреаттар, дипломаннар.
Быйылыгы үөрэх сылын 13 буолан бүтэрдилэр: 2 туйгун, 7 үчүгэй үөрэхтээх баар. Кылаас салайааччыта Люция Николаевна Максимова. Билигин бастыҥ кылаас оҕолоро Сиинэ кэрэ айылҕатын көрө бараары долгуйа күүтэбит.
