18 Тохсунньу 18.01
  • -48°
  • $ 73,82
  • 83,32

Куобахха азербайджан кыыһа Фалрия Тагидазе чөмпүйүөннээтэ

16:37, 15 июля 2016
Текст:

«Туймаада» стадиоҥҥа от ыйын 14 күнүгэр саха национальнай көрүҥэр куобахха Азербайджан хамаандатын кыра уҥуохтаах, хатыҥыр кыыһа Фалрия Тагидазе 17, 87 миэтэрэни түһэн, бастаата. 


Спорду таптааччылар казах эбэтэр саха куобахчыттара бастыахтара диэн билгэлээбиттэрин киэр илгэн чөмпүйүөннээбит Фалрияны кытта кэпсэттим.

— Чаҕылхай кыайыыгынан эҕэрдэлиибин!
Баһыыба.
— Эн хантан итиччэ күүс-уох ылаҥҥын, лидердээн иһэр кыргыттары барыларын кыайталаатыҥ?
Бэйэм да билбэппин ээ. Бука, күүскэ дьарыктаммытым туһалаатаҕа буолуо. Атахтарым былчыҥнара күүскэ ыалдьаннар, финалга салгыы ыстамматым. Ол да үрдүнэн мин көрдөрүүбүн ким да куоһарбата. Бэл, ойдоҕун ахсын эптэр эбэн испит казах кыыһа чугаһатта эрээри, сиппэтэ.
— Саха ыстаныыларын уруккаттан билэҕин дуо?
Суох. Быйыл кыһын биһиэхэ Азербайджаҥҥа саха национальнай ыстаныыларыгар күрэхтэһии ыытыллыбыта. Аан бастаан онно көрөн сөбүлээбитим уонна бэйэм үтүктэн ыстанар буолбутум.
— Оччоҕо эн тоҕо кылыыга уонна ыстаҥаҕа кыттыбатыҥ?
Атын күрэхтэһиилэргэ кыттарым мэһэйдээтэ. 4х400 эстафета кэнниттэн сылайан хаалбытым. Мин бүгүн эрэ атын ханнык да күрэхтэһиим суох буолан, босхолон бу кытынным уонна табылламмын олус үөрдүм.

Оттон уолаттарга Саха сирин хамаандатын спортсменнара күннээтилэр. Дмитрий Дмитриев 34,02 миэтэрэни түһэн чөмпүйүөннээн, Семен Ноговицын (32,53) иккис буолан улаханнык үөртүлэр. Кинилэр бу көрүҥҥэ Сибиир бастыҥ спортсменын Дмитрий Бочкаревы үһүс миэстэҕэ үтүрүйдүлэр.

0
0
18 января 18.01
  • -48°
  • $ 73,82
  • 83,32