17 От ыйа 17.07
  • 19°
  • $ 88,28
  • 96,26

Хамаҕаттаҕа "Уордьаннаах Сүөкүлэ" кинигэ сүрэхтэннэ

18:02, 29 февраля 2016
Текст:
Читайте нас на
Яндекс Новости
ЯДВ

Нам улууһун хамаҕатталара нэһилиэк Күнүн сүргэлэрэ көтөҕүллэн бэлиэтээтилэр. Дьоро күн Д.Новгородов аатынан “Кэскил” балаҕаҥҥа “Уордьаннаах Сүөкүлэ” диэн кинигэ сүрэхтэниитэ буолбутун туһунан СИА-ҕа нэһилиэк олохтооҕо Мария Винокурова иһитиннэрдэ.


Ахтыы кинигэҕэ Нам оройуонун соҕотох Ленин уордьаннаах дьахтарын, аатырбыт ыанньыксытын, коммунист Фекла Сидорова уонна кинини кытта бииргэ үлэлээбит үөлээннээхтэрин, Арыы Тиит төһүү үлэһиттэрин туһунан кэпсэнэр. Кинилэр олохторо, үлэлэрэ олорон ааспыт кэмнэрин сиэркилэтэ буолан, оччотооҕу история, идеология тыыннаах туоһуларын итэҕэтиилээхтик көрдөрөр. Сүрүн дьоруой — “Ленин” колхуоска, “Нам”, “Комсомольскай” сопхуоска үлэлээбит биллиилээх ыанньыксыт Фекла Сидорова», — диэн Мария Григорьевна кэпсээтэ.

Кинигэ 50 экземплярынан тахсан урууларыгар-аймахтарыгар, бииргэ үлэлээбит дьонугар: билигин нэһилиэк ытык-мааны кырдьаҕастарыгар, урукку ыанньыксыттар оҕолоругар дохсун ытыс тыаһыгар доҕуһуоллатан күндү бэлэх буолан туттарыллыбыт. Кинигэни Фекла Васильевна кыыһа Варвара Харлампьева дьонтон ахтыы хомуйан, хаһыат матырыйаалларынан байытан, хаартыскаларынан ситэрэн-хоторон биэрбит.

Кини кинигэ “Хоһуун үлэһит”, “Ленин орденнаах ыанньыксыт”, “Сүөкүлэ ыҥырыылара, суруктара”, “Арыы Тиит биригээдэтэ”, “Александра Тихонова аатынан ыччат-комсомольскай фермата”, “Бииргэ үлэлээбит үөлээннээхтэрэ”, “Куоталаһыылаах ыанньыксыттар дневниктэрэ”, “Оройуон көрдөрүүлэрэ”, “Общественнай үлэҕэ”, о.д.а. бастартан турарын, барыта 164 материал киирбитин бэлиэтээтэ. Кинигэ геройа Фекла Васильевна күүстээх, дьаныардаах үлэтин “Ленин суола” хаһыат элбэхтэ сырдаппытын, ол ыстатыйалар сүрүн докумуон буолбуттарын ыйда.

Мария Григорьевна дьоро киэһэҕэ дьон-сэргэ көхтөөхтүк кыттыбытын, истиҥ-иһирэх көрсүһүү, долгутуулаах ахтыһыы буолбутун эттэ. Оччолорго биригэдьиирдээбит Иван Колесов ахтыы оҥорбут. “Фекла Васильевна маннык олоппоһунан ынах ыан үрдүк кирбиилэри ситиспитэ, уордьан ыларга тиийэ үүммүтэ” диэн этэн туран, кинигэ ааптарыгар Варвара Федоровнаҕа талах олоппос бэлэхтээн, үтүө өйдөбүнньүк оҥорбут. Онтон улуус дьаһалтатын нэһилиэктэри кытта үлэҕэ испэсэлииһэ Сергей Сергучев ыччаты үлэҕэ-хамнаска иитэр-үөрэтэр суолталаах кинигэ тираһын элбэтэри наадалааҕынан аахпыт.

Тэрээһиҥҥэ саха графикатын төрүттээччи, худуоһунньук Ефим Шапошников кыыһа Аита Ефимовна ыалдьыттаабыт. Кини уордьаннаах ыанньыксыт кыыһын Фекла Васильевнаны кытта дьоннорун туһунан кинигэлэрин бэлэхтэспиттэрэ ураты түгэн буолбут.

Дьоро киэһэ нэһилиэк баһылыга Иван Максимов Варвара Федоровнаҕа махтал сурук туттарбыт итиэннэ төрөөбүт нэһилиэгэр ийэтин аатынан уулуссаҕа уһаайба анаабыттарын иһитиннэрбит. В.Ф. Харлампьева Дьокуускайга олорор, В.Маяковскай аатынан Сайсарытааҕы библиотекаҕа библиограбынан үлэлиир.

Следите за самым важным и интересным в Telegram-канале и WhatsApp-группе ЯСИА