17 Тохсунньу 17.01
  • -48°
  • $ 73,82
  • 83,32

Хачыкаакка спорт уонна култуура сайдыытыгар туһуламмыт спартакиада 15-с төгүлүн ыытылынна

11:53, 23 февраля 2020
Текст:

Хачыкаат нэһилиэгэр «Сарыал» култуура киинигэр Аҕа Дойду көмүскэлин күнүгэр анаан «САМЫРТАЙ» муниципальнай тэриллии уокуругар нэһилиэктэргэ спорт уонна култуура сайдарын туһугар туһуламмыт спартакиада 15-с төгүлүн ыытылынна. Үгэс быһыытынан «Ректайм» хампаанньа Саха сиригэр «Дойдуга бэриниилээх буолуу» сылын чэрчитинэн ыытта.


Хачыкаат олохтоохторо маннык үтүө дьаһал кинилэргэ ыытыллар буолан, спорт, култуура өттүгэр үүнэллэр-сайдаллар, көхтөөхтөр. Ол курдук вокалга, фольклорга, хореографияҕа илин-кэлин түһүстүлэр.

Бастыҥнарынан ааттаннылар: вокалга 1 миэстэ «Ситим» вокальнай коллектива — Күөрдэм, 2 миэстэ Михаил Саввин — Хачыкаат, 3 миэстэ Карина Тарасова — Тиит-Эбэ, фольклорга 1 миэстэ бөлөх толоруутугар «Дьөһөгөй» норуот ырыатыгар дьүһүйүү — Күөрдэм, 2 миэстэ Надежда Захарова хомуска сыыйа тардан дьүһүйдэ — Хачыкаат, 3 миэстэ «Утум» бөлөх норуот ырыаларын ыллаатылар — Тиит-Эбэ, хореографияҕа 1 миэстэ «Баллада о военных лётчицах» — Күөрдэм, 2 миэстэ «Чороонноох үҥкүү» — Хачыкаат, 3 миэстэ «Эҕэрдэ үҥкүүтэ» — Тиит-Эбэ. Кыайыылаахтарга рекламнай агенство аатыттан дипломнары уонна өйдөбүнньүк статуэткалары туттардылар.

Бу күн күөрдэмнэр ох курдук оҥостон, кустук курдук куоһанан кэлбиттэрэ харахха быраҕыллар буолан, ким да утарсыбата. Кэнсиэр быыһыгар эстрада сулустара Паша Ченянова — Умсуура, Константин Степанов, Карина Табарова — Кэрэли, Иннокентий Лебедев — Амилан ырыаларынан киэргэтэн, дьон-сэргэ дуоһуйа сынньанна.

«Нэһилиэктэргэ култуура уонна спорт олоҕо инникилээх буоларыгар ыытыллар тэрээһин көҕүлээччилэригэр, биир дойдулаахтарбытыгар «РЕКТАЙМ» рекламнай агенство салалтатыгар, убайдыы-бырааттыы Абек, Афанасий Киприяновтарга уонна агенство бары үлэһиттэригэр биир дойдулаахтарын ааттарыттан барҕа махталбытын тиэрдэбит, маннык төрөөбүт дойдуларыгар бэриниилээх уолаттардаах буоламмыт дэриэбинэ сайдар,чэчириир. Бу тэрээһиҥҥэ кэлэммит биһиги култуура үлэһиттэрэ саҥа сонун нүөмэрдэри көрөммүт сүргэбит көтөҕүлүннэ«, — диэн суруйар Лидия Харитонова.

Спартакиада үбүлүөйдээх сыла Патриотизм сылыгар түбэспитэ олохтоохтору өссө төгүл кынаттыыр, инникигэ эрэллэригэр кыаҕы саҕар.

Дьүүллүүр сүбэҕэ үлэлээтилэр: Хаҥалас улууһун «Арчы Дьиэтэ» норуот айымньытын киинин үлэһиттэрэ, директор Лидия Васильевна Харитонова, методист Дмитрий Дмитриевич Ющенко, «Саргы Түһүлгэтэ» киинин үҥкүүһүтэ Максим Семенович Степанов.

0
0
17 января 17.01
  • -48°
  • $ 73,82
  • 83,32