Саха сирин баһылыга Айсен Николаев Хаҥалас улууһугар оробуочай сырыытын кэмигэр 2029 сылга от ыйыгар Покровскайга буолар «Манчаары Оонньуулара» спорт национальнай көрүҥнэригэр XXIII Спартакиаданы бэлэмниир уонна ыытар тэрийэр кэмитиэт мунньаҕын ыытта. Ол туһунан www.sakha.gov.ru сайт иһитиннэрэр.
Мунньах кыттыылаахтара Спартакиадаҕа бэлэмнэнии былаанын олоххо киллэрии хаамыытын, спортивнай инфраструктураны тутууну, кыттааччылары уонна ыалдьыттары олохсутар усулуобуйаны тэрийиини, ону тэҥэ куорат эйгэтин кэлимник сайыннарыы боппуруостарын көрдүлэр. Оонньууларга бэлэмнэнии Саха сирин баһылыгын 2026 сыл муус устар 1 күнүнээҕи дьаһалынан бигэргэтиллибит соруктар былааннарыгар сөп түбэһиннэрэн, үс сыл устата 31 тэрээһини олоххо киллэриини көрөр.
Айсен Николаев “Манчаары Оонньууларын” ыытыы Хаҥалас улууһун сайдыытын дьоһун түһүмэҕэ буолуохтааҕын бэлиэтээтэ. Кини Спартакиада Покровскайга 36 сыл буолан баран төннөрүн санатта: 1993 сыллаахха манна өрөспүүбүлүкэ 23 оройуонуттан 497 спортсмен кыттыылаах Манчаары XII Оонньуулара буолан ааспыта.
«Манчаары оонньуулара — көннөрү спортивнай күрэхтэһии буолбатах. Бу көлүөнэлэри ситимниир тыыннаах тиһик, чемпионнары иитэр оскуола уонна биһиги спортсменнарбытыгар бэйэлэрин маастарыстыбаларын көрдөрөллөрүгэр кыах. Бу күрэхтэһиилэргэ норуоппут бастыҥ хаачыстыбалара — үлэһит буолуу, дьаныардаах буолуу уонна утарсааччыга ытыктабыл көрдөрүллэр. Онон спорт национальнай көрүҥнэрин сайыннарыыга мэлдьи болҕомто ууруллар», — диэтэ Айсен Николаев.
Оонньууларга бэлэмнэнии чэрчитинэн Покровскайга элбэх хайысхалаах чэбдигирдэр-спортивнай комплекс, 3 тыһыынча миэстэлээх трибуналаах уонна чэпчэки атлетикаҕа манежтаах стадион, Өктөм сэлиэнньэтигэр спортивнай саала, Ой сэлиэнньэтигэр модульнай единоборство саалата тутуллаллара, ону тэҥэ саҥа трибуналаах уонна сылаас сылгы базалаах ипподрому саҥардыы былааннанар.
Мунньахха хас биирдии эбийиэк бырайыактааһынын билиҥҥи статуһун уонна кинилэри үбүлээһин боппуруостарын көрдүлэр.
Хаҥалас улууһун баһылыга Сергей Гребнев спортивнай инфраструктура тутуутун кытта сэргэ Покровскайы кэлимник саҥардыы ыытылларын иһитиннэрдэ. Кини этэринэн, куорат маастар-былаана уонна территория туристическай кода оҥоһуллаллар. Бырайыактар Саха сирин кэлэр көлүөнэлэрин Тус сыаллаах пуондатын өйөбүлүнэн «ЛЕТО» компетенция Киинин сакааһынан олоххо киирэллэр.
Бүгүҥҥү күҥҥэ маастар-былааны бэлэмнээһин бастакы түһүмэҕэ түмүктэннэ, куорат сайдыытын тутаах хайысхалара уонна инвестиционнай бырайыактар испииһэктэрэ быһаарылынна. Докумуону оҥорууну 2026 сыл балаҕан ыйыгар түмүктүүр былааннаахпыт.
«Хаҥалас улууһа Манчаары Оонньууларын 36 сыл буолан баран ылыаҕа. Олохтоохтор Спартакиада ыытылларын туһунан сонуну улахан өрө көтөҕүллүүлээхтик ылыннылар. Дьон манна оройуон сайдыытын дьиҥнээх кэскилин көрөллөр. Настырыанньа бойобуой, оробуочай», —диэн Сергей Гребнев бэлиэтээтэ.
Мунньах кыттыылаахтара спортсменнары уонна күрэхтэһии ыалдьыттарын олохтооһун боппуруостарыгар туспа болҕомтолорун уурдулар. Эрдэттэн ааҕыынан, Спартакиада түмүктүүр чааһыгар 7000 кэриҥэ киһи кыттара күүтүллэр.
Бигэргэтиллибит балаһыанньаҕа олоҕуран, XXIII Спартакиада үс түһүмэҕинэн ыытыллыаҕа. 2028 сыллаахха муниципальнай уонна өрөспүүбүлүкэтээҕи сүүмэрдиир күрэхтэһиилэр буолуохтара, оттон финал стартара 2029 сыл от ыйыгар Покровскайга ыытыллыахтара.
Бырагыраамаҕа хапсагай, мас-рестлинг, ыстаныы, национальнай уонна хотугу тустуу, чэпчэки атлетика, гиирэ спорда, үгэс буолбут ох саанан ытыы, ат сүүрдүүтэ уонна ох саанан ытыы киириэхтэрэ.
Айсен Николаев Хаҥалас улууһун дьаһалтатыгар, профильнай министиэристибэлэргэ, биэдэмистибэлэргэ Оонньууларга бэлэмнэнии кыраапыгын хайаан да тутуһууну, спортивнай эбийиэктэри барыларын кэмигэр тутууну уонна былаан дьаһалларын олоххо киллэриини хааччыйарга сорудахтаата.
«Былааннаммыт үлэ барыта олохтоммут болдьоххо кытаанахтык толоруллуохтаах. Биһиги бэлэмнэниибит хаачыстыбатыттан Манчаары Оонньууларын ситиһиилээхтик ыытыы эрэ буолбакка, Хаҥалас улууһун спортивнай уонна куорат инфраструктуратын салгыы сайыннарыы эмиэ тутулуктаах», — диэн бэлиэтээтэ Саха сирин баһылыга.
