Улуус сылгыһыттара дьаһалта дьиэтигэр түмсэн үлэни сүрүннүүр, ирдэбили улаатыннарар, дьөһөгөй оҕотун хайдах элбэтэр туһунан сүбэлэстилэр. Улуустааҕы тыа хаһаайыстыбатын управлениетын начаалынньыга Марат Данилов кэпсээбитинэн, сылгыларга бөрө кутталламмыт.
Улуус үрдүнэн биэс тыһыынчаттан тахса сылгы баар. Мантан 3000-ҕа чугаһыыр төбө — бааһынай хаһаайыстыбаларга, икки тыһыынчаттан тахса – кэтэхтэргэ. Начаалынньык бэлиэтээбитинэн, улууска 99 бааһынай хаһаайыстыба сылгынан уонна ынах сүөһүнэн дьарыктанар эбит буоллаҕына, ол иһиттэн 57 бааһынай хаһаайыстыба чуо сылгынан дьарыктанар. 2000 сыллаахха дьөһөгөй оҕотун уопсай ахсаана улуус үрдүнэн 3956 буоллаҕына, 2015 сыл түмүгүнэн 5175 төбөҕө тэҥнэспит. Онтон нэһилиэктэртэн Маҕаныга сылгы ахсаана 2012 сылтан бэттэх 24% үрдээбит. Маны сэргэ, улуустарыгар икки хаһаайыстыба племенной үлэнэн дьарыктанарга сорунуулаахтык ылсыбыт.
Марат Юрьевич сылгы уопсай туругар, ахсаана уларыйыытыгар, хайдах төрүөхтэнэригэр күн-дьыл, тулалыыр эйгэ, адьырҕалар улахан сабыдыаллаахтарын бэлиэтиир. «Ааспыт сылга бөрөлөр 11 сылгыны тардыбыттара, 23 адьырҕа сууһарыллыбыта. Быйылгы сылга киирэн баран икки бөрө өлөрүлүннэ эрээри, дьон-сэргэ ардай аһыылаахтар суолларын бэлиэтии көрбүттэрэ баар чахчы», — диэтэ кини.
Сылгыһыттар сүбэ мунньахтарыгар СӨ тыа хаһаайыстыбатын министиэристибэтиттэн, «Сахаплемобъединение» ААУо, ДьТХНЧИ кыттыбыттар. Түһүлгэ кыттыылаахтара тыйыс айылҕаҕа үлэлиир дьон үлэтин-хамнаһын өйүүрү, суолтатын үрдэтэри, өбүгэ төрүт дьарыгар эдэрдэри хайдах сыһыарары, сир-уот боппуруоһун, атын улуустары кытта сылгыһыттар үлэ үөрүйэҕин атастаһаллара туһалаах эрэ буолуоҕун, үрдүкү салалтаттан болҕомто ирдэнэрин ыйбыттар.
