Тохсунньу 28 күнүгэр киэһэ «РИК» хочуолунайа үлэҕэ холбонно. Икки хочуолтан биирдэрэ үлэлиир. Былаан быһыытынан итиини объектарга биэрэллэр. Саппааска модульнай хочуолунай эмиэ баар.
«Икки 12- лии квартиралаах, биир 8-с квартиралаах дьиэлэргэ ититии бэрилиннэ.
Улуус дьаһалтатыгар уонна Духуобунас киинигэр эмиэ ититии киирдэ. Үлэ график быһыытынан барар, билигин сэттэ биригээдэ түүннэри-күннэри үлэлииллэр», — диэн иһитиннэрэр СИА-ҕа улуус хаһыатын кылаабынай редактора Василий Алексеев.
Дьаһалта, Россиятааҕы ЫБММ Саха сиринээҕи салаатын суһал бөлөҕүн, СӨ быыһыыр сулууспатын уонна баһаарга быыһаар гарнизон үлэһиттэрин күүһүнэн тэтимнээх үлэ барар, барыта хонтуруолга тутуллар, нэһилиэнньэни кытта үлэ ыытыллар, биирдиилээн көмө оҥоһуллар.
Горнай улууһун Бэрдьигэстээх бөһүөлэгэр билигин даҕаны «ЧС» эрэсиимэ муниципальнай таһымҥа салҕанар.
Быһылаан тахсыбыт сиригэр 150 киһи, 28 техника, ол иһигэр Россия ЫБММ тус састаабыттан 26 киһи уонна 4 техника үлэлиир.
