Аҕа дойдуну көмүскээччилэр күннэринэн, олунньу 23 күнүгэр, Дьокуускайга «Город трудовой доблести» мемориальнай комплекс бырайыагын көрдөрүөхтэрэ. Дьаһал Аҕа дойду улуу сэриитигэр кыайыыны уһансыбыт сахаларга ананар.
Кыайыы пааркатыгар баар стелаҕа параднай аарка тутуллуоҕа. Манна куорат олохтоохторун хорсун быһыылара көрдөрүллүөҕэ. Ол туһунан СИА-ҕа куорат кылаабынай архитектора Семён Сергеев кэпсээтэ. Комплекс тутуутун сайаапката Ил Дархан Айсен Николаев аатыттан Россиятааҕы байыаннай-историческай уопсастыбаҕа бу сыл саҥатыгар ыытыллыбыта. Уопсастыба дойду үрдүнэн баар эбийиэктэри курируйдуур, онтон бырайыак оҥоруутунан бары куораттарга тэҥинэн куонкуруһу ааспыт биир ааптар үлэлиир.
Кини хас биирдии куоракка ураты бырайыагы оҥорор, хас биирдии сиргэ олохтоохтор ситиһиилэрэ араас буолар. «Исписэлиис биһиги былаһааккабытын көрбүтэ уонна стела бары ирдэбиллэргэ сөп түбэһэрин бигэргэппитэ. Кини композицияны күүһүрдэн биэрэргэ этиилээх уонна стелаҕа аарка тутар наадалааҕын этэр. Манна сахалар ситиһиилэрэ көрдөрүллэр. Биһиги архыыптан хаартыскалары көрдөрбүппүт, билигин онон художественнай үлэни толоро сылдьар», — диэтэ Семен Сергеев.
Архитектор бырайыак хас да варианын көрдөрдө, онтон Дьокуускайга биир талылынна. Ааптар ситэриэхтээх уонна Аҕа дойдуну көмүскээччилэр күннэригэр киэҥ эйгэҕэ таһаарыахтаах.
Сиһилии https://ysia.ru/arku-trudovoj-doblesti-otkroyut-v-parke-pobedy-yakutska-ko-dnyu-goroda/
