Бүгүн Дьокуускай куоракка Ленин болуоссатыгар киэһэ 17:00 чаастан Саха Өрөспүүбүлүкэтин Ил Дархана Егор Борисов, Ил Түмэн бэрэссэдээтэлэ Александр Жирков, бырабыыталыстыба бэрэссэдээтэлэ Евгений Чекин, бырабыыталыстыба чилиэннэрэ, Ил Түмэн дьокутааттара, Дьокуускай куорат мэра Айсен Николаев, куорат олохтоохторо уонна ыалдьыттара Кемерово куоракка «Зимняя виншня» атыы-эргиэн киинигэр буолбут быһылаан сиэртибэлэригэр анаан кутурҕан чүмэчилэрин уматтылар уонна сибэкки уурдулар.
«Бу дьалаҕай быһыы, буруйдаахтар эппиэтинэскэ тардыллыахтаахтар. Саха Өрөспүүбүлүкэтин дьоно Кемерово куорат олохтооругар дириҥ кутурҕаммытын тиэрдэбит», — диэтэ Егор Борисов.
Егор Афанасьевич бу күннэргэ бары улуустары хабан туран, дьон-сэргэ тоҕуоруһар сирдэригэр, урбаанньыттар үлэлиир эбийиэктэригэр баһаартан сэрэхтээх буолууну бэрэбиэркэлииргэ сорудахтаабыт.
Санатан эттэххэ, кулун тутар 25 күнүгэр Кемерово куоракка «Зимняя вишня» атыы-эргиэн киинигэр баһаар буолан 64 киһи олоҕо былдьанна, 60-тан тахса киһи балыыһаҕа көрдөрбүт, балартан 15 киһи стационарга ылыллыбыт.
