25 От ыйа 25.07
  • 24°
  • $ 86,55
  • 94,38

Дмитрий Платонов: Кыһынын сүүрүү киһи этин-хаанын чэбдигирдэр

10:18, 10 февраля 2016
Текст:
Читайте нас на
Яндекс Новости
ЯДВ

Бу күннэргэ үнүстүүт үлэһиттэрэ уонна устудьуоннара Покровскай куоракка 33,6 кыраадыс тымныыга сүүрүүгэ Бүтүн Арассыыйатааҕы рекорду олохтооһуҥҥа кытыннылар.

“Урут тымныыга сүүрүүнэн дьарыктаныы киһи доруобуйатыгар буортулаах, тымныы — киһи тыҥатын быһа сиир, онон дьарык туһаны аҕалбат диэн этэ. Ол гынан баран, тымныыны таба туһаннахха, спортсмеҥҥа улахан туһаны аҕалыаҥ сөп. Маны аан бастаан Саха судаарыстыбаннай үнүбэрсиэтин эт-сиин өттүнэн иитии хаапыдыратыгар үлэлээбит, педагогика билимин хандьыдаата Николай Платонов тарҕатан саҕалаабыта. 1981 сыллаахха кини кыһыҥҥы сүүрүүнү тэрийбитэ, ол сүүрүү Хаҥалас улууһугар сылын ахсын ыытыллар буолбута. Онон Николай Платонов кэриэһигэр ыытыллыбыт сүүрүүгэ рекорд туруорулунна”, — диир Дмитрий Платонов.

Кини этэринэн, кыһыҥҥы дьарык тулуурдаах буоларга үөрэтэр, маны бэйэлэрин кэмнэригэр чемпион-сүүрүктэр Татьяна Жиркова уонна Семен Дедюкин уһун дистанцияҕа сүүрэллэригэр туһаммыттара.

ХИБҮ Эти-сиини эрчийии уонна спорт үнүстүүтүн 90 устудьуона уонна үлэһитэ 3 килэмиэтир уһуну сүүрүү кыттааччыларынан уонна судьуйаларынан буоллулар. Эр дьоҥҥо абсолютнай чемпионунан үнүбэрсиэт спортсмена Ньургун Софронов (10,15 сөкүүндэ) буолла. Дьахталларга ХИБҮ бэрэстэбиитэлэ Айталина Акимова 13,17 сөкүүндэ көрдүүлээх иккис миэстэ буолары ситистэ.

“Үнүбэрсиэт чэпчэки атлеттара кыһынын таһырдьа эмиэ дьарыктаналлар. Гипоксия усулуобуйатыгар спордунан дьарыктаныы үчүгэй форманы оҥосторго көмөлөһөр. Күһүн, тымныйан эрдэҕинэ, хааман уонна сүүрэн саҕалыахха наада. Киһи ис микроклиматын оҥосторо наада, ол эбэтэр, ичигэстик таҥныахтаах, сирэйин уонна этин тымныыттан харыстаныахтаах уонна атах таҥаһын көрүнэрэ ирдэнэр. Таһырдьа дьарык кэнниттэн олох тоҥумуохха наада, ол иһин тута дьиэҕэ киирэр ордук. Билигин үгүстэр  төрүгүк сыл скандинавскай хаамыынан уонна сүүрүүнэн дьарыктаналлара киһини үөрдэр. Бу киһи организымын бөҕөргөтөрүн тэҥэ, ыарыыны сэрэтэр күүстээх”, — диэн сүбэлиир дириэктэр.

Покровскай куоракка Арассыыйа рекордун олохтооһуҥҥа 416 спортсмен кыттыыны ылла. Н.Н. Платонов аатынан кыһыҥҥы өрөспүүбүлүкэтээҕи сүүрүүнү СӨ Спорка министиэристибэтэ, Хаҥалас улууһун дьаһалтата, ХИБҮ Эти-сиини эрчийии уонна спорт үнүстүүтэ, “Ситим” медиа-бөлөх тэрийэн ыыттылар.

Следите за самым важным и интересным в Telegram-канале и WhatsApp-группе ЯСИА