Чурапчы улууһун Хахыйах учаастагар хаарбах дьиэттэн көһөрүү бырагырааматынан аҕыс ыал саҥа дьиэ күлүүстэрин туттулар. Ыаллар түөртүү кыбартыыралаах икки саҥа, толору хааччыллыылаах дьиэҕэ олохсуйуохтара. Бу туһунан СИА улуус пресс-сулууспатыгар сигэнэн иһитиннэрэр.
«Биһиги улууска быйыл барыта 104 кыбартыыра саҥардыллыахтааҕыттан бастакынан Хахыйах нэһилиэгин олохтоохторо саҥа дьиэлэнэр дьолун биллилэр. Тыа сиригэр толору хааччыллыылаах дьиэ нэһилиэк сайдарыгар төһүү күүс буолар», — диир улуус баһылыга Андрей Ноговицын.
Бырагыраама бастакы түһүмэҕэр улуус үрдүнэн барыта 350 толору хааччыллыылаах дьиэлэр киирбиттэриттэн 60-на нэһилиэктэргэ этэ. 2024 сылга диэри 600-тэн тахса ыал саҥа дьиэлэниэхтээх.
Соловьев нэһилиэгин баһылыга Мария Кронникова саҥа дьиэлэнии тыа сиригэр эдэр дьон олохсуйарын, оҕо төрүүрүн көҕүлүүр диир.
Дьиэлэри Дмитрий Захаров салайааччылаах «Ампир» ХЭТ тутта.
