Мэҥэ Хаҥаласка «Хаарбах туруктаах дьиэттэн дьону көһөрүү» регионнааҕы аадырыстаммыт бырагыраама уонна «Олорор дьиэ уонна куорат эйгэтэ» национальнай бырайыак чэрчитинэн аҕыс олорор дьиэ үлэҕэ киирэрэ былааннанар. Бу туһунан «Мэҥэ Хаҥалас улууһа» МО дьаһалтатын хапытаалынай тутууга салалтатын начальнига Илья Григорьев эттэ диэн, «Мегино-Кангаласский улус» телеграм-ханаал суруйар.
«Саахалланар кутталлаах дьиэлэр бары булгуччу көтүрүллэллэр диэн буолбатах, сорох түгэҥҥэ хапытаалынай өрөмүөн оҥорон, сыбаайатын, эркинин бөҕөргөтөн биэриэхтэрин эмиэ сөп. Ону олохтоох дьаһалта быһаарар. Хаарбах дьиэлэр испииһэктэригэр киллэрэргэ олохтоохтор сайабылыанньа суруйан, хас биирдии кыбартыыраттан дьиэни бас билии докумуонун хомуйан, тутулуга суох тэрилтэ «Элбэх кыбартыыралаах дьиэ чахчы саахалланар кутталлаах» диэн чинчийэн көрүүтүн түмүгүн олохтоох дьаһалтаҕа туттарыахтаахтар», — диэн Илья Григорьев чуолкайдыыр.
Ол курдук Майаҕа Исаев уулусса 11 аадырыһыгар турар 61 кыбартыыралаах, Байкалов уулуссаҕа 6 нүөмэригэр турар 32 кыбартыыралаах таас дьиэлэр (тутааччы-бэдэрээччик «Мэҥэ тутуу» тэрилтэ), Исаев уулусса 1 нүөмэрдээх дьиэтин 2-с куорпуһа («Арктика-строй» ХЭУо), Томторго Сосновай уулусса 7 нүөмэрдээх дьиэ 2-с куорпуһугар түөртүү кыбартыыралаах 2 олорор дьиэ («Аурис» ХЭУо), Табаҕаҕа Совхознай уулусса 10 нүөмэригэр турар 15 кыбартыыралаах олорор дьиэ, Хорообукка Игнатьев уулуссаҕа элбэх кыбартыыралаах олорор дьиэ («Электромонтаж» ХЭТ), Аллараа Бэстээх бөһүөлэгэр Алданскай уулуссаҕа 35 кыбартыыралаах («Траст» ХЭТ), диэн суруйда улуус дьаһалтатын пресс-сулууспата.
